இதுதான் விஷயம் ::: யார் யாருக்கு எப்படிப் புரிய வைப்பது?

 2500 கோடி ரூபாய் செலவில் சென்னையில் 4 பூங்காக்கள் அமைக்கப்படும் என்று அமைச்சர் கே என் நேரு அறிவிப்பு வெளியிட்டிருக்கிறார். பூங்காக்கள் அவசியம் தான்!  ஒரு பேரிடர்த்தொற்று அபாயம் முற்றிலும் குறையாத தருணம் இது, இப்போது இது ரொம்ப முக்கியமா என்று கேள்வி கேட்டால் பதில் வருமா வராதா என்று எனக்குத் தெரியாது.

1980 களில் ராஜீவ் காண்டி பிரதமராக இருந்த சமயம், புதிய கல்விக்கொள்கை ஒன்று அறிவிக்கப்பட்டு அதன் ஒரு அம்சமாக மாவட்டத்துக்கு ஒரு நவோதயா பள்ளியும் அறிவிக்கப்பட்டது. எந்தவொரு நல்லவிஷயத்தையும் குறுக்கே விழுந்து மறிக்கும் இடதுசாரிகள் அதையும்  கடுமையாக எதிர்த்தார்கள். தமிழகத்தில் அன்று ஆண்ட கழகம் என்ன காரணத்தாலோ நவோதயா  பள்ளிகளைத் தமிழகத்துக்குள் நுழைய விடவில்லை. இப்போதும் கூட பூங்காவுக்குச் செலவிட உத்தேசித்திருக்கும் 2500 கோடியில் 125 - 150 நவோதயா பள்ளிகளைத் தமிழக அரசே செலவுசெய்து ஏழை எளிய மக்களுக்குத் தரமான கல்வி கிடைப்பதை உறுதிசெய்யலாம். நீட் தேர்வு பற்றி எல்லாம் வீணாக அச்சப்படாமல் மாணவர்கள் தயாராக தரமான பள்ளிகளை உருவாக்குவதுதான் உண்மையான சமூகநீதி, சமநீதியும் கூட! இலவச சைக்கிள்களோ, கலர் டிவி போன்ற இலவசங்களோ அல்ல என்பதை  யாரிங்கே ஆட்சியாளர்களுக்குப் புரியவைப்பது? 

மே 2க்கு முன்னால் தமிழகத்தில் எல்லோருமே பெட்ரோல் - டீசல் விலையேற்றத்திற்கு மத்திய - மாநில அரசுகளைக் கண்டித்துத் தான் போராடினார்கள். அன்றைய எதிர்க்கட்சித் தலைவர் ஸ்டாலின், பாஜக ஆளும் அஸ்ஸாம் மாநிலத்தை உதாரணமாக காட்டி, அங்கு போல தமிழகத்திலும் மாநில அரசு வரியை குறைத்து, விலையை குறைத்தால் என்ன என்றெல்லாம் கேட்டார்..

ஆனால் தற்போது, பெட்ரோல் - டீசல் விலையேற்றத்தைக் கண்டிக்கும் எல்லாப் போராட்டத்திலும் மாநில அரசு கழன்று விட்டது; மத்திய அரசை மட்டும் கண்டிக்கிறார்கள். இங்கே ஒரு நியாயமான ஊடகமிருந்தால், அது என்ன கேள்வி எழுப்ப வேண்டும்?  என சுந்தர் ராஜ சோழன் முகநூலில் கேள்வி எழுப்புகிறார். யார் இதற்குப் பதில் சொல்வது?

பிரிட்டன் உட்பட சில மேற்கத்திய நாடுகளில் Shadow Government என்று எதிர்க்கட்சிகளின் அரசியல் செயல் பாடுகள், துறை வாரியான யோசனைகள், விமரிசனம் என்பதை காப்பியடித்து பாமக இங்கே சிலகாலமாக நிழல் நிதிநிலையறிக்கை (பட்ஜெட் ) வெளியிட்டு வருகிறது. இந்த வருடத்துக்கான நிழல் நிதிநிலை அறிக்கையை டாக்டர் ராம்தாஸ் இங்கே வெளியிட்டு இருக்கிறார். 126 அறிவிப்புக்களைக் கொண்டதாக இந்த அறிக்கை இருப்பதை பாமகவினரே புரிந்துகொண்டு விடுவார்களா என்ற சந்தேகம் எனக்கிருக்கிறது. ஆளும் தரப்பு எப்படிப்புரிந்து கொள்ளுமோ?

ஒரு போலிப்பாதிரி மரணம் குறித்து விதம்விதமாகப் புகழுரைகளும் கார்டூன்களும் வந்துகொண்டே இருப்பதன் மீதான சலிப்பை போக்குகிற மாதிரி ஒத்திசைவு பதிவர் வெ.ராமசாமியின் இந்தப்பதிவு

மீண்டும் சந்திப்போம்.

ஸ்டாலின் டெல்லி பயணம் சாதனையா? ::: புதிய தமிழகம் கட்சி Dr. கிருஷ்ணசாமி!

புதிய தமிழகம் கட்சியின் நிறுவனரும் தலைவருமான டாக்டர் K .கிருஷ்ணசாமியை தமிழக அரசியலில் எப்படி மதிப்பிடுகிறோம்? அவரை அரசியலில் எந்த இடத்தில் வைத்திருக்கிறோம்? 2021 சட்டமன்றத் தேர்தல் கூட்டணி அமைப்பதில் அதிமுக செய்த மிகப்பெரிய தவறாக தேமுதிக, புதிய தமிழகம் கட்சிகளை ஒதுக்கிவைத்தது தான் என்பது என்னுடைய கருத்து. பாமகவுக்கு மட்டுமே கொடுத்த முக்கியத்துவம், பிஜேபி உடன் ஒருவிதமான அலட்சியம் இவைகளும் அதிமுகவின் தோல்விக்குக் காரணங்களாக இருந்தன. பிஜேபியும் கூட அதே தவறைத்தான் இன்று வரை செய்து கொண்டிருப்பதாக எனக்குத் தோன்றுகிறது. இன்று பிரதான எதிர்க் கட்சியாக, பெயரளவுக்கே அதிமுக இருந்து வருகிறது. அதிமுக செய்ய வேண்டிய வேலையை பாமகவின்  டாக்டர் ராமதாசும் புதிய தமிழகம் கட்சியின் டாக்டர் கிருஷ்ணசாமியும் தான்  செய்துவருகிறார்கள் என்பதை இந்தப் பக்கங்களுக்கு வரும் நண்பர்களுடைய கவனத்திற்குக் கொண்டுவர விரும்புகிறேன்.  

இந்தியாவை மாநிலங்களின் ஒன்றியம் என்றால்  தமிழ்நாடு என்பது ஊராட்சிகளின் ஒன்றியமா என்ற அழுத்தமான கேள்வியை தமிழக அமைச்சர்களிலேயே கடைக்குட்டி தியாகராஜனுக்கு முன்வைக்கிற தைரியம் புதிய தமிழகம் கட்சி டாக்டர் கிருஷ்ணசாமிக்கே இருந்தது. தமிழக அரசின் செயல்பாடுகள் மீதான ஆரோக்கியமான விமரிசனத்தையும் கிருஷ்ணசாமி தொடர்ந்து செய்து வருகிறார். கவனிக்கிறோமா?

உதாரணத்துக்கு முகநூலில் இன்று அவர் பதிவுசெய்து இருக்கும் ஒரு அரசியல் விமரிசனம்::

'ஸ்டாலின் டெல்லி பயணம்' சாதனை ஆனதா? வெறும் சம்பிரதாயத்தில் முடிந்ததா.?

மனநிறைவுக்குள் மறைந்து போன ஸ்டாலினின் திருப்தி!! இலைகள் அமைதியை விரும்பலாம்! காற்று சும்மாயிருக்குமா?

மே மாதம் 07 ஆம் தேதி தமிழக முதலமைச்சராகப் பதவி ஏற்றுக்கொண்ட திரு மு.க. ஸ்டாலின் அவர்கள் 40 தினங்கள் கழித்து ஜூன் மாதம் 17ஆம் தேதி டெல்லியில் பாரத பிரதமர் மோடி அவர்களைச் சந்தித்தார். நாடாளுமன்றத் தேர்தலுக்கு முன்பாக சென்னை ஐஐடி வளாகத்தில் நடந்த அரசு விழா ஒன்றுக்கு வருகை புரிந்த மோடி அவர்களுக்கு எதிராக திமுகவும், அதன் தோழமை இயக்கங்களும் கருப்பு கொடிகளாலும், கருப்பு பலூன்களாலும் சென்னையின் மண்ணையும், விண்ணையும் நிரப்பி போராட்டம் செய்தனர். அதையும் தாண்டி மோடி அவர்களின் நிகழ்ச்சி நடைபெற்ற ஐஐடி மாணவர் வளாகத்திலும் அத்துமீறி நுழைந்து கருப்புக் கொடி காட்டிய சம்பவங்களை எவரும் எளிதில் மறந்துவிட முடியாது. எந்த மோடிக்கு எதிராக ”திரும்பிப் போ” என்று கோஷம் எழுப்பினார்களோ? அந்த மோடியை தேடி அவருடைய இல்லம் சென்று சந்திக்க வேண்டிய காலத்தின் கட்டாயம் ஏற்பட்டுவிட்டது. ஆனால் சென்னையில் மோடிக்கு எதிராக நடந்தது போல, டெல்லியில் ஸ்டாலினுக்கு எதிராக எவரும் அதுபோன்ற செயல்களில் ஈடுபட்டதாகத் தெரியவில்லை. அது டெல்லி அரசியல் நாகரீகம்!

மாநிலங்களில் புதிதாக முதலமைச்சராக பொறுப்பேற்று கொண்டவர்கள் பாரத தேசத்தின் பிரதமரைச் சந்திப்பது வெறும் சம்பிரதாயத்திற்கானது மட்டுமல்ல, தங்களது சாதுரியத்தால் அந்தந்த மாநிலத்திற்கு வரவேண்டிய திட்டங்களை வலியுறுத்தி சாதிப்பதே அதில் உள்ளார்ந்த அம்சம். இதுபோன்ற ஒரு முக்கியமான சந்திப்பிற்கு முன்பாக கள அளவில் “Home Work” என்று சொல்லக்கூடிய முன்னோட்ட பணிகளை செவ்வனே செய்து முடிக்க வேண்டும்.

“Go Back Modi” என சமூக வலைதளங்களில் டிரென்டிங் செய்ததும், விமான நிலையத்தைத் தாண்டி பதினைந்து கி.மீட்டருக்கு அப்பால் உள்ள கிண்டி ஐஐடி வளாகத்திற்குள்ளும் கருப்புக்கொடி காட்ட முயற்சி செய்ததும் மோடியின் நெஞ்சில் நீங்காத வடுவாகி இருக்கலாம். ஆனால் அதையும் தாண்டி ஒரு சுமூகமான உறவுக்கான பாதையை ஸ்டாலின் அவர்களால் உருவாக்கி இருக்க முடியும். ஆனால் அதுபோன்ற ஒரு ராஜ தந்திர நடவடிக்கையை முறையாக மேற்கொண்டதற்கான எந்த அறிகுறியும் இல்லை.  

ஏனெனில் பிரதமருடனான சந்திப்பு என்பது வெறும் சம்பிரதாயத்தையும் தாண்டி தமிழகத்திற்குக் கேட்டுப் பெற வேண்டிய பல கோரிக்கைகள் அவர் தலைக்குமேல் இருக்கிறது. கடந்த நாடாளுமன்ற, சட்டமன்ற தேர்தலுக்கு முன் நடைபெற்ற கசப்பான சம்பவங்களை மறக்க ஒரு இதமான சூழலை உருவாக்கி அதன் பின் இந்த சந்திப்பு நடைபெற்றிருந்தால் டெல்லி சென்று சென்னை திரும்புவதற்கு முன்பாகவே சில கோரிக்கைகள் நிறைவேறியிருக்கக் கூடும். கடந்த 17 ஆம் தேதி  பிரதமர் – ஸ்டாலின் நேரடி சந்திப்பின் போது 25க்கும் மேற்பட்ட  கோரிக்கைகள் அடங்கிய ஒரு புத்தக வடிவிலான மனு அவரிடத்தில் கொடுக்கப்பட்டுள்ளது. இதிலேயே தமிழகம் எதிர்கொள்ளும் முக்கிய பிரச்சினைகளுக்கு முன்னுரிமை கொடுக்கப்படவில்லை என்பது தெளிவாகிறது. 

சேலம் மற்றும் தூத்துக்குடி விமான நிலையத்தை விரிவுபடுத்த வேண்டிய விஷயம் என்ன தலை மேல் இருக்கக்கூடிய பிரச்சனைகளா? அதையெல்லாம் ஏன் தற்போதைய உடனடி கோரிக்கைகளில் சேர்க்க வேண்டும்? கரோனா இரண்டாவது அலையில் தொழில், வர்த்தகம் மற்றும் அனைத்து சேவைகளும் நாற்பது நாட்களுக்கு மேலாக முற்றாக முடங்கிப் போயுள்ளது. ஏழை, எளிய, நடுத்தர மக்கள் முதல் அனைத்து தரப்பினருமே ஊரடங்கால் சிக்கித் திணறுகின்றனர்.  தமிழக மக்கள் மட்டுமின்றி, தமிழ்நாடு அரசும் மிகப்பெரிய அளவிற்கு நிதி நெருக்கடியால் சிக்கித் தவிக்கிறது. எனவே, இப்பொழுது தமிழக அரசை நிதி நெருக்கடியிலிருந்து மீட்டெடுப்பதற்கான போதிய நிதி ஆதாரத்தைப் பெறுவதற்கான கோரிக்கை தானே முக்கியத்துவம் பெற்றிருக்க வேண்டும்?

ஒவ்வொரு குடும்பத் தலைவிக்கும் மாதம் ரூபாய் 1000, அதேபோல, ஓய்வூதியம் பெறுவோருக்கு ரூபாய்1000-லிருந்து 1500, பெட்ரோல் டீசலுக்கு தலா ரூ 5 குறைப்பு, நகைக்கடன் தள்ளுபடி போன்ற நிதி ஆதாரத்தோடு சமந்தபட்ட முக்கியமான தேர்தல் வாக்குறுதிகளைக் கூட தமிழ்நாடு அரசு நிறைவேற்ற எந்த முனைப்பும் காட்டவில்லையே? இந்நிலையில் 12,500 கோடி நிலுவையில் உள்ளது என்று ஜிஎஸ்டி கூட்டத்தில் வீராவேசமாகப் பேசினால் மட்டும் போதுமா? பாரத பிரதமருடனான சந்திப்பில் ஜிஎஸ்டி நிலுவை, 13 மற்றும் 14-வது நிதி ஆணைய பங்கீடுகள் போன்ற மிக முக்கிய நிதி அம்சங்கள் அல்லவா அக்கோரிக்கை மனுவில் முக்கிய இடம் பெற்றிருக்க வெண்டும்?

தமிழக நிதி நிலைமையை எடுத்துச் சொல்லி, குறைந்தபட்சம் அந்த நிலுவைத் தொகையை இரண்டு, மூன்று தவணைகளாகப் பெறுவதற்கு உண்டான உத்தரவாதத்தைப் பிரதமரிடத்திலே அப்போதே பெற்று அவர் டெல்லியிலிருந்து சென்னை வந்து சேருவதற்கு முன்பாக ரூபாய் 4000 அல்லது 5000 கோடி பெறப்பட்டிருந்தால் அது மிகப்பெரிய சாதனையாக இருந்திருக்கும். ஆனால் அதுபோன்ற முக்கியமான வாய்ப்பை ஸ்டாலின் நழுவவிட்டு விட்டார். சாதனை நிகழ்த்துவதைக் காட்டிலும் சம்பிரதாயத்தை நிறைவேற்றுவதிலும், வெறுப்பு அரசியல் செய்வதையுமே முக்கியமானதாகக் கருதியதன் விளைவுதான் இதுவோ? 

சாதனைகளை நிகழ்த்த அதற்குண்டான வலுவான முன்னேற்பாடுகள் “Spade Work” முறையாகச் செய்யப் பட்டு இருக்க வேண்டும். ஆனால் மாறாக ”எரியும் நெருப்பில் எண்ணெய்யை ஊற்றுவது போல” -  ”பச்சை புண்ணில் உப்பைத் தடவுவது போல” மே 07-ஆம் தேதி பதவியேற்ற நாள் முதல் டெல்லி சென்று திரும்புவது வரை மத்திய அரசை ’ஒன்றிய அரசு’ என இழிவு படுத்துவதிலேயே குறியாக இருந்தார்கள். திமுக பாஜகவை எதிர்ப்பது என்பது வேறு; தமிழக அரசு மத்திய அரசை எதிர்ப்பது என்பது வேறு. மீண்டும் மீண்டும் ஏதாவது ஒரு வழியில் மத்திய அரசுடன் தமிழக அரசு மோதல் போக்கை மட்டுமே கையில் எடுப்பது தமிழகத்துக்கு நிகழ்காலத்திலும் பாதிப்பை உண்டாக்குகிறது; எதிர்காலத்திலும் பாதிப்பை உண்டாக்கும் என்ற அச்சத்தையே உருவாக்குகிறது.

மத்திய அரசின் அதிகார வரம்பு என்ன? மாநில அரசின் அதிகார வரம்பு என்ன? என்பது கூட தெரியாமல் ஒரு மாநிலக் கட்சி தனது தேர்தல் அறிக்கையில் 500க்கும் மேற்பட்ட வாக்குறுதிகளை அளித்து விட்டு, இப்போது அத்தனையையும் நிறைவேற்ற வேண்டும் என பட்டியலிட்டுக் கேட்டால், அதை நிறைவேற்றுவது எப்படி மத்திய அரசுக்கு சாத்தியமாகும்? ஒரு அரசியல் கட்சியின் கொள்கை சார்ந்த அறிக்கை என்பது வேறு; தேர்தல் வாக்குறுதி என்பது வேறு; நடைமுறை பிரச்சினை என்பது வேறு. புதிய கல்வித் திட்டம் (NEP), நீட் தேர்வுகள் (NEET), மூன்று வேளாண் திட்டங்கள், மின் சட்டம் போன்றவை எல்லாம் நாடாளுமன்றத்தில் விவாதித்து நிறைவேற்றப்பட்ட சட்டங்கள். இந்தியா முழுமைக்குமான சட்டங்களை ஒரு மாநிலக் கட்சியின் தேர்தல் வாக்குறுதியை அப்படியே ஏற்றுக்கொண்டு மத்திய அரசு ரத்து செய்ய முடியுமா?

7 பேர் விடுதலை, செங்கல்பட்டு தடுப்பூசி ஆய்வகம் போன்ற அம்சங்கள் குறித்து என்ன உத்திரவாதம் அளிக்கப்பட்டது என்பது தெரியவில்லை. மொத்தத்தில் நடந்த சந்திப்பு 20 நிமிடங்கள். வெளியே வந்த தமிழக முதல்வர் ஸ்டாலின் பிரதமருடனான சந்திப்பு ’மன நிறைவையும், மகிழ்ச்சியையும்’ தந்தது என்று கூறினார். பொதுவாக இது அரசியல் தளத்தில் பயன்படுத்தப்படும் Diplomatic வார்த்தை அல்ல, பொதுவாக ’திருப்தி’ என்ற வார்த்தைதான் பயன் படுத்தப்படும். அதாவது தனிப்பட்ட கோரிக்கையை நிறைவேற்றினால் மட்டுமே ’மகிழ்ச்சி’ என பயன்படுத்தப்படும். ஏன் ’திருப்தி’ என்ற வார்த்தையைத் தவிர்த்து, மனநிறைவு என்ற வார்த்தை பயன்படுத்தினார்? என்பது புதிராக உள்ளது.

மோடி அவர்களுடனான சந்திப்பு மனநிறைவாக இருந்தது, எப்போது வேண்டுமானாலும் தொடர்பு கொள்ளலாம் என பிரதமர் கூறியதாக ஸ்டாலின் அகமகிழ்ச்சி கொள்கிறார். மோடி அப்படிச் சொல்லியிருந்தால் அது அவரின் பெருந்தன்மையும், திறந்த மனப்பான்மையும் காட்டுகிறது. அரசியல் ரீதியாக மாற்றுக் கருத்து இருந்தாலும் தமிழ் மாநிலத்தைப் பாகுபாடில்லாமல் தங்களுடன் அணைத்துச் செல்ல மோடி விரும்புகிறார் என்பதே இதன் மூலம் வெளிப்படுகிறது. ஆனால் ஸ்டாலினோ அடுத்த பத்தாவது நிமிடத்தில் டெல்லி தமிழ்நாடு இல்லத்தில் மீண்டும் ’ஒன்றிய புராணம்’ பாடி தனது வெறுப்பு அரசியலையே வெளிப்படுத்தி இருக்கிறார். அரசியல் கலக்காமல் மத்திய அரசுடன் மாநில அரசு இணக்கமாகச் செல்லுமா? அல்லது பிணக்குடனே தொடருமா? என்பதே கேள்வி.

இலைகள் அமைதியை விரும்பினாலும், காற்று சும்மா இருக்குமா?

மிகவும் எதிர்பார்த்த மோடி - ஸ்டாலின் சந்திப்பு வெறும் சம்பிரதாயமாகவே முடிந்து விட்டது; சாதிக்க வாய்ப்பிருந்தும், ஸ்டாலின் சாதிக்க தவறிவிட்டதால் ஏமாந்து போனது தமிழ் மக்களே! ஸ்டாலின் அவர்களின் மன மகிழ்ச்சி - மன நிறைவுக்கு அவரின் வேறு எந்த கோரிக்கைகளை பிரதமர் மோடி அவர்கள் நிறைவேற்றித் தந்தார்? என்பதற்கு எதிர்வரும் காலமே பதில் சொல்லும்! 

டாக்டர் க.கிருஷ்ணசாமி MD,நிறுவனர் & தலைவர். புதிய தமிழகம் கட்சி.

20.06.2021

கவனிக்கவேண்டிய முக்கியமான பகுதிகளை தடித்த எழுத்துக்களில் தந்திருப்பது என்னுடைய வேலை. 

குப்பை அரசியல்வாதிகளுக்குத் தேவையே இல்லாமல் முக்கியத்துவம் கொடுப்பதில், டாக்டர் கிருஷ்ணசாமி மாதிரி கவனிக்கப்படவேண்டியவர்களை கவனிக்க மறந்து விடுகிறோமா? எப்போது நம்முடைய பார்வையை விசாலமாக்கிக்கொள்ளப் போகிறோம்?

மீண்டும் சந்திப்போம்.   

ஒரு வெப் சீரீஸ்! ஈழ ஆதரவு வியாபாரிகள் பொங்குவது ஏன்?

கருத்துசுதந்திரம் பற்றி வாய்கிழியப்பேசும் தமிழகப் பிரபலங்கள் பலருடைய முகமூடியை ஒரு வெப் சீரீஸ் கிழித்தெறிந்திருக்கிறது. அமேசான் பிரைமில் நேற்று முன்தினம் வெளியான The Family Man 2  சீரீசைத் தடை செய்யவேண்டும் என்ற கூக்குரல் முதலில் நாம் தமிழர் கட்சி சீமானிடமிருந்து, அடுத்து வேலைவெட்டி இல்லாமல் அறிக்கை மட்டுமே வெளியிட்டுக் கொண்டிருக்கும் வைகோ இவர்களிடமிருந்து ஆரம்பித்தது. மெல்ல மெல்ல இந்தக் கூக்குரல்கள் விரல்விட்டு எண்ணக்கூடிய சில பிரபலங்கள் மற்றும்  அனாமதேயங்களிடமிருந்து கிளம்பின. இதில் பெரிய  வேடிக்கை என்னவென்றால் சீரீசின் ட்ரெயிலரை மட்டுமே பார்த்துவிட்டு இந்த அறிவுக்கொழுந்துகள் குதிக்க ஆரம்பித்துவிட்டார்கள் என்பதுதான்.

ஒன்பது பகுதிகளாக ஸ்ட்ரீமிங் வீடியோவாக OTT தளத்தில் அறிவிக்கப்பட்டபடியே ஜூன் 4 அன்று The Family Man 2  வெளியாகிவிட்டது. வெள்ளிக்கிழமை முதல் 4 பகுதிகளையும் நேற்றைக்கு மிச்சம் 5 பகுதிகளையும் பார்த்து முடித்ததில் ஈழத்தமிழரை இழிவுபடுத்தும் இந்த சீரீசை அனுமதிக்கமாட்டோம், மத்திய அரசே உடனே தடை செய் என்றெல்லாம் இங்கே உள்ள கோமாளிகள் சிலர் எதற்காகக் கூவினார்கள் என எனக்கு மட்டுமல்ல எவருக்குமே சுத்தமாகப் புரியவில்லை! இந்த லட்சணத்தில் தமிழ்நாடே The Family Man 2 வை எதிர்த்துக் கொந்தளித்ததாகவும், மத்திய அரசுக்கு வைகோ உள்ளிட்ட சிலர் கடிதம் அனுப்பியிருப்பதாகவும் செய்திகள்! செய்திகள் ஏற்படுத்திய நிலநடுக்கத்தின் அதிர்வுகளை உங்கள்பக்கத்தில் உணர்ந்தீர்களா என்ன!!

சைமனும் இன்னும் பல தமிழ் உணர்வாளர்களும் இன்னும் சிலரும் "தி பேமிலி மேன் 2" எனும் சீரியஸ் விடுதலை புலிகளை கொச்சைபடுத்துவதாக கிளம்பிவிட்டனர். புலிகள் இயக்கம் இந்தியாவில் மட்டுமல்ல அமெரிக்கா கனடா ஏன் ஐரொப்பிய யூனியனில் கூட தடைசெய்யபட்ட இயக்கம் என்பது உண்மை

என்ன சொல்லி தடை செய்தார்கள்?

மிக மோசமான தற்கொலை போராளிகள் என்பது முதல் சொந்த இனமான லட்சுமண் கதிர்காமர் எனும் தமிழரை கொன்ற இயக்கம் என ஏகபட்ட குற்றசாட்டுகள். அதுவும் 2005ல் நார்வே தூதுகுழு புலிகளை சாடிவிட்டு வெளியேறியதும், ஆனானபட்ட அமெரிக்க தூதர் "புலிகள் மோசமான தோல்வி நோக்கி நகர்கின்றார்கள்" என்பதும் பெரும் குற்றசாட்டு.

பிரபாகரன் தனக்கு தானே வைத்து கொண்ட சூனியம் 2002 கிளிநொச்சி மாநாடு, அதில் உலகம் ஒப்புகொண்ட விஷயம் இந்த கோஷ்டி மொத்தமாக ஒழிக்கபட வேண்டியது மற்றபடி ஒரு முடிவுக்கும் வரமாட்டார்கள் என்பதே! புலிகளுக்கும் பாகிஸ்தானிய தீவிரவாதிக்கும் தொடர்பு உண்டா என்றால் நிச்சயம் உண்டு என்பதற்கு ஆதாரம் பாகிஸ்தானில் இலங்கை கிரிக்கெட் வீரர்கள் மேலான துப்பாக்கி சூடு

அப்பொழுது இலங்கை அரசு புலிகள் மேல் ராணுவ நடவடிக்கையில் ஈடுபட்டிருந்தது, அப்பொழுது பாகிஸ்தானிலில் இலங்கை வீரர்களின் பேருந்து தாக்கபட்டபொழுது புலிகளுக்கும் பாகிஸ்தானிய தீவிரவாதிகளுக்கும் உள்ள தொடர்பு உலகுக்கே தெரிந்தது.

இது ஆச்சரியமல்ல, ஒரு தீவிரவாத இயக்கம் இன்னொரு இயக்கமில்லாமல் வளரமுடியாது இயங்க முடியாது

அவ்வகையில் பாகிஸ்தான் தீவிரவாதிகளோடு அல்ல, பின்லேடனின் சில தீவிரவாதிகள் உலகமெல்லாம் சுற்ற புலிகள் உதவினர் எனும் வகையில்தான் அமெரிக்கா அவர்களை கட்டம் கட்டியது. சக போராளி குழுக்களை கொன்றது, ராஜிவ் பிரேமதாசாவினை கொன்றது கடைசியிலும் திருந்தாமல் லட்சுமண் கதிர்காமரை கொன்றது உலகெல்லாம் தீவிரவாதிகளுடன் வலம் வந்தது என புலிகள் செய்த அட்டகாசம் ஏராளம்.

அதைத்தான் "தி பேமிலி மேன் 2" எனும் சீரியல் சொல்கின்றது, அதில் உண்மையினை தவிர ஏதுமில்லை

இதனால் தமிழருக்கு அவமானம் என கிளம்ப அவசியமில்லை அது முட்டாள்தனம். ஈழதமிழருக்கு கிளம்பிய போராட்ட குழுக்கள் சுமார் 40, அதில் 4 கடைசியாக தேறியது அதில் 3ஐ ஒழித்து ஒரே பிரதிநிதி என தன்னை சொல்லிகொண்டனர் புலிகள். ஆனால் உலகம் அதை ஏற்கவில்லை, எனினும் பேசிபார்க்கலாம் என வந்த மேல்நாட்டு குழுவும் இது திருந்தாத கட்ட பஞ்சாயத்து கோஷ்டி என ஓடிவிட்டது.

ஆக இது இந்திய‌ தமிழருக்கான அவமானம் அல்ல, இந்திய தமிழரின் ஒரே அவமானம் திமுக அதை தவிர ஏதுமில்லை. மாறாக இந்த சீரியல் வந்தால் இலங்கையில் இப்படி ஒரு அடாவடி இருந்தது எனும் உண்மையில் ஒவ்வொரு ஈழ தமிழனும் தலைகுனிய வேண்டும்.ஈழதமிழனின் மானம் காற்றில் பறக்க கூடாது என அங்கிள் சைமன் குதிக்கின்றார், ஆனால் அது என்றோ கிழிந்து உலகம் எல்லாவற்றையும் கண்டு விட்டது என்பது அங்கிளுக்கும் அவரின் அடிபொடிகளுக்கும் புரியவில்லை, பரிதாபம்!  இப்படி முகநூலில் ஸ்டேன்லி ராஜன் சுருக்கமாகச் சொல்லி  பஞ்சாயத்தைக் கலைத்துவிட்டாரே! அதுவும் 15 நாட்களுக்கு முன்பே!  

ராஜீவ் காண்டியைக் கொலைசெய்ததில் விடுதலைப் புலிகள் மீது மட்டுமல்ல, ஈழத்தமிழர்கள் மீதுமே இருந்த ஆதரவு, அனுதாபத்தைப் பெரும்பாலான தமிழக மக்கள் துடைத்தெறிந்து விட்டார்கள். வெறுமனே  கூவிக்கொண்டு இருப்பவர்கள் ஈழத்தமிழர் ஆதரவு வியாபாரம் செய்கிற ஆசாமிகள் மட்டும்தான் என்பதையும் தமிழக மக்கள் அறிந்தே இருக்கிறார்கள்.

அது போகட்டும்! The Family Man 2  எப்படியிருக்கிறது?

ஒரு உளவாளியின் கதை என்பதில் குடும்பம் கொஞ்சம், தொழில் ரீதியாக எதிரிகள் கொஞ்சம் என இரண்டையும் கதாநாயகன் எப்படி சமாளிக்கிறார்? இதுதான் கதை முடிச்சு! முதல் சீசனும் சரி, இரண்டாவது சீசனும் சரி கதாநாயகன் ஸ்ரீகாந்த் திவாரி என்கிற NIA வின் ரகசியக் குழு உளவாளி எப்படி தன்னுடைய குடும்பத்தில் எழும் பிரச்சினைகளுடன், தொழில்ரீதியாக தேசத்துக்கு ஏற்படும் தீவிரவாத அச்சுறுத்தலையும் சமாளிக்கிறார் என்பது மட்டும் தான் மெயின். முதல் சீசனில் வில்லன்  ரசாயன ஆலையில் விஷவாயுவைக் கசிய விட முயல்வதைத் தடுப்பது, இரண்டாவது சீசனில் இந்திய இலங்கை பிரதமர்கள் செய்துகொள்ள இருக்கிற ஒப்பந்தத்தைத் தடுக்க முயற்சிக்கும் தற்கொலைப் போராளி ஒருத்தியை, கதாநாயகன் எப்படி முறியடித்து தேசத்தைக்  காப்பாற்றுகிறார் என்பதுதான் கதை. அங்கங்கே சில லாஜிக் மீறல்கள் இருந்தாலும் சீரீஸ் விறுவிறுப்பாக நகர்வதில் அதெல்லாம் பெரிதாகத் தெரியவில்லை. 

6/10

இந்திய இலங்கைப் பிரச்சினை என்றால் ஈழப் போராளி இல்லாமலா? ஈழப்போராளியாக சமந்தா நடித்ததில் அவரையும் தமிழின விரோதியாகச் சித்தரித்து, நம்மூர் கோமாளிகள் காமெடி செய்திருக்கிறார்கள்.  

தமிழ்நாடு என்றாலே கோமாளிகள் அரசியல் முதல் எல்லாவற்றிலும் புகுந்து குட்டையைக் குழப்புகிற பிரதேசம் என்றாக்கிவிட்டார்கள். இந்த வெப் சீரீசை மட்டும் விட்டுவைப்பார்களா?  

மீண்டும் சந்திப்போம்.      

சுதந்திரத்தை எதைவைத்து, எப்படி அளவிடுவது? #சேகர்குப்தா

Freedom House என்றொரு அமைப்பு இருப்பது யாருக்காவது தெரியுமா? ஜனநாயகம், சுதந்திரம் ஒவ்வொரு நாட்டிலும் எந்த அளவுக்கு இருக்கிறது என்று இவர்கள் மதிப்பீடு செய்வதை இதற்கு முன்னால் கேள்விப்பட்டது உண்டா? ட்வீட்டர், முகநூல் முதலான big tech ஊடகங்கள் மீதான அவநம்பிக்கையும் கோபமும்  எதிர்ப்பாகப் பெருகி வருகிற நேரம் பார்த்து இந்த அமெரிக்க அமைப்பு, இப்படி ஒரு  மதிப்பீட்டை வெளியிட்டிருப்பது தற்செயலானது தானா? பாகிஸ்தான், இந்தியா இருநாடுகளையும் ஒரே தட்டில் வைத்துப் பார்த்திருக்கிற இந்த மதிப்பீடு நம்பக கூடிய ஒன்றாக இருக்க முடியுமா? 

  

சேகர் குப்தா இந்த 27 நிமிட வீடியோவில் விளக்கிச் சொல்லியிருப்பது எந்த அளவுக்கு ஏற்றுக்கொள்ளும்படி இருக்கிறது என்ற கேள்விக்கு பதிலை நீங்கள்தான் வந்து சொல்ல வேண்டும்!

சீன விவகாரத்தில் மட்டும் மத்திய அரசின் அணுகுமுறை மீது கடுமையாகச் சாடும் ப்ரம்ம செலானி சொல்கிற கருத்தில் எனக்கு முழுமையான உடன்பாடு உண்டு.

சுதந்திரத்தை, இங்கே கூக்குரலிடும் Paid Media வை வைத்து மதிப்பிடமுடியாதென்பது எவ்வளவு நிஜமோ அதுபோலவே வெளிநாடுகளிலிருந்து நிதியுதவி பெற்று அதை இந்த நாட்டுக்கெதிராகவே பயன்படுத்தும் PETA. AMENESTY போன்ற அமைப்புகளைக் கட்டுக்குள் கொண்டுவந்ததை வைத்தும் கூட மதிப்பிட முடியாது.

சேகர் குப்தா, அந்த அமைப்பு எது எதை வைத்து எப்படி மதிப்பீடு செய்தார்கள் என்று சொல்வதைக் கேட்டுவிட்டு உங்களுடைய கருத்தை இங்கே கொஞ்சம் சொல்லுங்களேன்!

மீண்டும் சந்திப்போம்.

இதழியல் அறம் காத்த தினமணி ஆசிரியர் ஏ என் சிவராமன்!

 ஒன் வே, நோ எண்ட்ரி, நோ ஃப்ரீ லெப்ட், சிக்னலை மதிக்காமல் கடப்பது... இவற்றில் எல்லாம் பார்த்தீர்கள் என்றால், தவறு செய்பவர்களை தகுந்த நேரத்தில் பிடித்து அபராதம் விதிப்பது என்பதை விட, 

தவறு செய்யத் தூண்டி, வண்டியோட்டியின் கண்ணில் படாதவாறு இடது புறம் மரத்துக்குப் பின்னோ, தெருவிளக்கு மின் பெட்டிக்குப் பின்னோ மறைந்து நின்று... திடீரென இடப்புறம் திரும்பி வருபவரை கப் என்று பிடித்து, கறந்து விடுவது... போக்குவரத்து போலீஸாரின் இயல்பு. அவர்கள் என்றுமே, தவறு செய்யாமல் தடுக்கும் வகையில், வாகன ஓட்டிகளின் கண்ணில் படும் வகையில் நிற்பதில்லை! 

இது கிட்டத்தட்ட ஸ்டிங் ஆபரேஷன் போல்தான்! அதாவது பொறி வைத்துப் பிடிப்பது.ஏற்கெனவே சபல புத்தியுள்ள ஒருவனை, விதி மீற வைத்து, அபராதம் கறக்கும் ஒரு செயலைச் செய்வது அறமா? இது போன்றதற்கான விடையை, ஊடகங்களின் ஸ்டிங் ஆபரேஷனை வைத்து  நீதிபதி ராமசுப்ரமணியன் சொன்னது ரசிக்கும் படி இருந்தது. நல்ல தகவலாகவும் இருந்தது. 

எங்கே என்று கேட்கிறீர்களா?

***

தினமணி அறக்கட்டளையின் சார்பில், மார்ச் 1 ஆம் நாள், ஏ.என்.எஸ்., நினைவுச் சொற்பொழிவு என்றும், முதல் சொற்பொழிவாக நீதிபதி ராமசுப்ரமணியன் சிறப்புச் சொற்பொழிவு என்றும் பார்த்தேன். தலைப்பு இன்னும் தூண்டுதலாக அமைந்துவிட்டது. "இதழியல் அறம்” என்பதுதான் அது. 

நீதிபதி ராமசுப்ரமணியன் மீது பெரும் மரியாதை மட்டுமல்ல, எதிர்பார்ப்பும் உண்டு எனக்கு! நேரில் சந்தித்து அளவளாவிய தன்மையால் மட்டுமல்ல... எவர் ஒருவர் பசுவை வைத்து பூஜை செய்து நியமப்படி நடந்து கொள்கிறாரோ... அவர்  காமதேனுவின் அம்சம் ஆகிறார்! நீதிபதி ராமசுப்ரமணியன் தமது இல்லத்தில் இப்போதும் பசு மாடு வைத்து, கோ பூஜை முறையாகச் செய்து, தர்ம நெறிப்படி வாழ்வை நகர்த்திச் செல்பவர். அந்த நம்பிக்கை எனக்கு உண்டு! மேலும், நல்ல பேச்சுத் தமிழ் நடை கைவரப் பெற்றவர். கெக்கே பிக்கே நகைச்சுவை என மலிவான சரக்கை வலுக்கட்டாயமாகத் திணிக்காமல், இயல்பான கௌரவமான நகைச்சுவையைக் கையாளக் கூடியவர். அந்த எண்ணத்தில் ஏ.என்.எஸ்ஸுக்காகவும், தினமணிக்காகவும், நீதிபதியாருக்காகவும் இந்த நிகழ்ச்சிக்கு தனிப்பட்ட அழைப்பிதழ் வராவிட்டாலும், தினமணியின் பொது அழைப்பு காரணத்தால், தினமணி வாசகனாகவே இந்த நிகழ்ச்சிக்குச் சென்றேன்! 

***

நிகழ்ச்சியில் பேசிய அனைவரின் பேச்சுமான, ஓரளவு முழுமையான ரிப்போர்ட்... தினமணியில் 2ம் பக்கம் முழுமைக்கும் பிரசுரமாகியிருக்கிறது. பார்த்துப் படித்துக் கொள்க! நீதிபதியார் பேசியவை வழக்கம் போல் ரசிக்கத் தக்கனவாய் அமைந்திருந்தது. அவர் பேசியவற்றில் ஒரு கருத்து...

***

அறம் விலகக் காரணம்..? 

இதழ்களின் எண்ணிக்கை பெருகியது; (இதழ்கள் பெருகிய அளவுக்கு வாசகர்கள் பெருகாதது); இதழ்களுக்கு இடையேயான போட்டி மனப்பான்மை! முந்தித் தருதலில் குளறுபடி; கிடைத்தது மலினமாக இருந்தாலும் காசுக்காக செய்தியாக்குவது! தவிர்க்க இயலாத போட்டியால் பொறிவைத்தல் செய்திச் செயல்களில் ஈடுபடுவது.... - இப்படி சில காரணங்கள் முன்வைக்கப்பட்டது. 

அடுத்தது... அவரின் உரைத் தொகுப்பில் கடைசியாக இடம்பெற்ற முத்தாய்ப்பு வார்த்தைகள்! 

ஓர் இதழ், அறத்தில் பால் நிற்கிறதா அல்லது அப்பால் தள்ளிப் போகிறதா என்பதை, அந்த இதழ் வெளியிடும் செய்திகள், அதில் இடம்பெறும் கட்டுரைகளின் உண்மைத் தன்மை, பொதுநலன் மட்டுமே அதில் பொதிந்துள்ளதா அல்லது தங்களுடைய சுழற்சி (சர்குலேஷன்), மலிவான பரபரப்பு விற்பனையை மையமாகக் கொண்டுள்ளதா என்ற தன்மை, (சுயவிளம்பரம், சுயதம்பட்டம் கொண்டு விளங்கும் தன்மை) இவற்றுக்கான விடையில்தான் இதழியல் அறத்தின் உயிர் நாடி உள்ளது. 

***

இப்படியாக,இந்த உயிர்நாடியை உயர் நாடித் துடிப்பாய்க் கொண்டு செயல்பட்டதால்தான், ஏ.என்.எஸ் என்ற ஒரு சித்தாந்தத்தை இன்றளவும் நாம் சிந்தித்துக் கொண்டிருக்கிறோம். இது தலைமுறை கடந்த உயர் தனிச் சிந்தனை! 

இருக்கும்போது, ஜால்ரா போட்டு, அண்ணன் வாழ்க, ஐயா வாழ்க கோஷம் போடுவதெல்லாம் அவ்வப்போதைக்கு காதுக்கு குளிராகவும் மனதுக்கு போதையாகவும் இருக்கும்... ஆனால் காலம் கடந்து நிற்பதுதான் பிறப்பின் பயன். அந்தப் பிறவிப் பயனை அடைந்த ஏ.என்.எஸ் போன்றவர்கள், நமக்கு வழிகாட்டிகளாய் அமையட்டும்!

இப்படி ஒரு நெகிழ்ச்சியான தருணத்தை செங்கோட்டை ஸ்ரீராம் தனது முகநூல் பகிர்வில் எழுதியிருக்கிறார். 

மாணவப்பருவத்தில் மதுரை தினமணி அலுவலகத்தில் திரு  ஏ.என்.எஸ் அவர்களை சற்றே கூச்சத்துடன் அணுகி சிறிது நேரம் உரையாடிய தருணம் இப்போது நெஞ்சில் நிழலாடுகிறது. கணக்கன் , குமாஸ்தா, ஒன்றேகால் ஏக்கர் பேர்வழி, அரைகுறை வேதியன், அரைகுறை பாமரன் என்ற புனைபெயர்களில் ஆயிரக்கணக்கான கட்டுரைகளை தினமணியில் எழுதியிருக்கிறார். பீகார் இயக்கம் என்ற தலைப்பில் ஜெயப்ரகாஷ் நாராயணன் தலைமையேற்ற ஊழலுக்கெதிரான மாணவர் போராட்டம் குறித்து அவர் தொடர்ந்து 42 நாட்கள் தினமணியில் எழுதிய கட்டுரைகள், இப்போதிருக்கும் winner takes all என்பதான வெஸ்ட்மின்ஸ்டர் தேர்தல் முறைகளில் இருக்கும் கோளாறுகளை விளக்கி, விகிதாசாரப் பிரதிநிதித்துவம் போல வேறு நாடுகளில் நடைமுறையில் இருக்கும் தேர்தல்முறை இவைகளையும் எடுத்துச் சொல்லி, தேர்தல் சீர்திருத்தகங்களுக்கான அவசியத்தை வாசகர் சுயமாகச் சிந்திப்பதற்காக எழுதிய கட்டுரைகள் என்று நிறைய விஷயங்கள் இப்போதும் மனதில் தங்கி இருக்கின்றன.

மார்ச் 1 அவர்பிறந்த தினம். 2001 இல் அவர் மறைந்த தினமும் அதுவே.

மீண்டும் சந்திப்போம்.   

கழுதைக்கு வெள்ளிமூக்கு முளைத்த கதையாக #நாசா நாடகம் முடிகிறது!

பாண்டிச்சேரி அரசு நாளை நம்பிக்கை வாக்கெடுப்பை எதிர்கொள்ள வேண்டிய நிலையில், இன்றைக்கு ஆளும் தரப்பிலிருந்து இரண்டு சமஉக்கள் ராஜினாமா செய்து ஆட்டத்தைக் கலைத்திருக்கிறார்கள். இதில் ஒருவர் காங்கிரஸ் இன்னொருவர் திமுக என்பதுதான் தமாஷ்! கிரண் பேடி மீதே குறைசொல்லி இத்தனை நாட்கள் அரசியல் செய்துவந்த கோட்டைவாய் நா சாவின் பவிசு அம்பலத்துக்கு வந்து சந்தி சிரிக்கிறது. நாராயணசாமியை முதல்வராக்கிய நாளிலிருந்தே காங்கிரஸ் கட்சிக்குள் இருந்த அதிருப்தி இப்போது வெளிப்பட்டிருப்பதில், ஒன்று: காங்கிரஸ் மீது கட்சி MLA/MPக்களே நம்பிக்கை இழந்து வருவது மீண்டும் மெய்ப்பிக்கப்பட்டிருக்கிறது. இரண்டு: மேலிடத்திலிருந்தே முதல்வர்களை நியமனம் செய்கிற காங்கிரஸ் கலாசாரம் தொடர்வதில் மாநிலங்களில் கட்சி வேரற்ற மரமாக மட்டுமே இருந்திருக்கிறது. இதை ஒதுக்கித்தள்ளிவிட்டு, வெளியே காரணங்களைத் தேடி, பழிசுமத்துவது வீணாய்ப்போன அரசியல் மட்டுமல்ல, தங்களைத்தாங்களே ஏமாற்றிக்கொள்வதும் கூட!    

ராஜினாமா செய்த திமுக சமஉ, இசுடாலினையும் கோர்த்துவிட்டுப் பேசியது பக்கா திராவிட தமாஷா! நாசா என்ன செய்யப்போகிறார்? காலதாமதம் செய்யாமல் கண்ணியமாக ராஜினாமா கடிதத்தைக் கொடுக்கப்போகிறாரா? அல்லது கடைசிவரை வறட்டு இழுப்பாகவே இருந்து இன்னும் அசிங்கப்படப் போகிறாரா? இதுவரை தகவல் எதுவும் இல்லை. 

Twitter தளம் இந்தியாவில் தனக்குத்தானே மூடுவிழா நடத்திக் கொள்ளும் நிலைமையை வலிந்து செய்கிற மாதிரித்தான் இருக்கிறது. முந்தாநாள் சத்ரபதி சிவாஜி பிறந்தநாளை முன்னிட்டு நரேந்திர மோடி எழுதிய செய்தியை இப்படி வடிகட்டியிருக்கிறது. வாட்சப் தனது பிடிவாதத்தைத் தளர்த்திக்கொள்ளாமல் முரண்டு பிடித்து வருவது, முகநூல் செலெக்டிவாகச் செயல் படுவது, இப்படி எல்லாமாகச் சேர்ந்து இன்னொரு கிழக்கிந்திய கும்பேனி  மாதிரி ஆக முயற்சிக்கிறார்களோ?

இந்திய இறையாண்மையை மறுதலிக்கும் எந்தவொரு முயற்சியையும் முறியடிக்க வேண்டிய பொறுப்பு நமக்கு இருக்கிறது.

மீண்டும் சந்திப்போம்                  

#சாட்டர்டேபோஸ்ட் எல்லாமே அரசியல் தானா?

மூன்று நிமிடத்துக்கும் குறைவான இந்த தினமலர் வீடியோ பார்த்ததில் எனக்குள் எழுந்த முதல் கேள்வி::: IPAC  பிரசாந்த் கிஷோர் திமுகவின் வெற்றிக்காகத்தான் உத்தி வகுக்கிறாரா அல்லது தன்னுடைய சொந்த அஜெண்டாவை  முன்வைத்து மத்திய அரசு, பிஜேபி, நரேந்திர மோடி மீதான வெறுப்பை முன்வைக்கிறாரா?  

நடக்கப்போவது மாநில சட்டசபைத் தேர்தல் பிரதான எதிரியாகக் களத்தில் முன் நிற்பது அதிமுக என்கையில் மோடி அட்டாக் மோடுக்கு மாறி இசுடாலின் என்ன சாதிக்கப் போகிறார்? உங்களுக்கு ஏதாவது புரிந்தால் எனக்கும் கொஞ்சம் சொல்லுங்கள்!

கரூர் லைட்ஹவுஸ் (சினிமா தியேட்டர்) கார்னரில் இருந்த காந்தி சிலையை, எனக்குத்தெரிந்து இத்தனை வருடங்களில் எந்தக் காங்கிரஸ்காரனும் கண்டு கொண்டதாக நினைவுக்கு வரவே இல்லை இப்போது கரூர் தொகுதியின் எம்பியாக இருக்கும் ஜோதிமணி கூட, தேர்தலுக்கு முன்போ பின்போ அந்த காந்தி சிலையைக் கண்டுகொண்ட செய்தி எதையும் பார்த்ததாக நினைவும் இல்லை! இப்போது திடீரென்று அம்மணிக்கு அங்கே புதிதாக ஒரு வெண்கலச்சிலை வைக்கப்பட்டதில் ஒரிஜினல் காந்தி மீது அக்கறை வந்துவிட்டதாம்! சிலையின் பீடம் தரமற்றதாக இருப்பதாக ஒரு அக்கப்போரை நடத்திக் கைதாகி இருக்கிறார் என்கிற செய்தியை புதிய தலைமுறை சேனல் செய்தியில் பார்த்தேன் முன்னாட்களில் இசுடாலின் சட்டசபையில் இருந்து வெளியேற்றப்பட்ட சமயத்தில் சட்டையைக் கிழித்துக்கொண்டு போஸ் கொடுத்ததை அப்படியே நினைவு படுத்துகிற மாதிரி இந்தப்படம் இணையத்தில் கிடைத்தது. அதிக வசதி இல்லாத குடும்பத்தில் இருந்து வந்த இந்தப்பெண்மணி ராகுல் காண்டியின் கவனத்தை ஈர்த்ததால் காங்கிரஸ் வேட்பாளராகி, திமுகவின் செந்தில் பாலாஜி தனது   அகதவிகடத்தையெல்லாம் காட்டியதில் ஜெயித்தும் விட்டார்! ஆனால் காங்கிரஸ் எம்பி மாதிரி செயல்படாமல் திமுக எம்பிக்கள் மாதிரியே நாடக அரசியல் செய்வது, இளைஞர்கள் அரசியலுக்கு வந்தால் ஒரு நல்ல மாற்றத்துக்கு வழிவகுக்கும் என்று நம்புகிற என்னைப்போன்றவர்களுக்கு பெரும் ஏமாற்றமே!  

என்னாது? காந்தியை சுட்டுட்டாங்களா? மொமண்ட்!   

          

மாசேதுங்கால் அவமதிக்கப்பட்டு  வெளியேற்றவும் பட்ட, மாவோ காலத்துக்குக் கொஞ்சம் பின்னாடி சீனக் கம்யூனிஸ்ட்  கட்சியால் திரும்ப அழைக்கப்பட்டு தலைமைப்பொறுப்பேற்றவருமான  டெங் சியாவோ பிங்கின் 24வது நினைவுதினமான நேற்று பாண்டிச்சேரி மார்க்சிஸ்ட் கம்யூனிஸ்ட் கட்சி ட்வீட்டரில் இப்படி நினைவு கூர்ந்திருப்பது சரிதான்! வறுமையின் பிடியில் சிக்கித்தவித்த சீனாவை, அந்நிய முதலீடுகள், தொழிற் சாலைகளுக்குக் கதவைத் திறந்து முப்பதே ஆண்டுகளில் ஒரு பொருளாதார வல்லரசாக மாற்றியவர் டெங் சியாவோ பிங்! கம்யூனிஸ்ட் கட்சியின் வரட்டுத் தத்துவங்களை ஒதுக்கிவைத்துவிட்டே சீர்திருத்தங்களை துணிந்து மேற்கொண்டார் என்பதை சௌகரியமாக  இந்திய மார்க்சிஸ்டுகள் மறந்துவிட்டு டெங் சியாவோ பிங்கை இப்போது முன்னிலைப் படுத்திப் பேசும்போது, நரசிம்மராவ் காலத்தில் மேற்கொள்ளப்பட்ட பொருளாதார சீர்திருத்தங்களுக்கு ஆதரவு கொடுத்தார்களா என்பதையும் பேசட்டுமே! 1964 இல் கையூனிஸ்ட் கட்சி பிளவுபட்டபோது சீன ஆதரவு நிலை எடுத்தவர்கள் மார்க்சிஸ்டுகளாகவும் அதுவும் 1968 இல் உடைந்து ஒரு பகுதி நக்ஸலைட்டுகளாகவும் ஆனதை இதுவரை வெளிப்படையாகப் பேசாதவர்கள் இப்போது சீன ஆதரவு நிலையை வெளிப்படையாகப் பேச ஆரம்பித்திருக்கிறார்கள், அவ்வளவுதான்!      

சீன கம்மினிஸ்டுகள் சீனாவிற்கு விசுவாசமானவர்கள். இந்திய கம்மின்ஸ்டுகளும் சீனாவிற்கு விசுவாசமானவர்கள் இந்தியாவுக்கும் இந்தியர்களுக்கும் எதிரிகள். என்று இங்கே நண்பர் ராஜசங்கர் பொங்கி இருப்பது நியாயமானதுதான்!

மீண்டும் சந்திப்போம்.

#சண்டேபோஸ்ட் சமூக ஊடகங்கள்! சாபமா வரமா?

Twitter Inc. ஒருபுறம், முகநூல் மறுபுறம் தங்களது இலவச சேவைகள் ஒன்றும் சமூக சேவைக்கானது அல்ல, முழுக்க முழுக்க வியாபாரம், வேறு உள்நோக்கம் கொண்டவை என்பதை அப்பட்டமாக அறிவித்ததோடு 2021 ஆம் ஆண்டு தொடங்கியிருக்கிறது  வாட்சப் தகவல்கள் கட்டாயமாக  ஓனர் முகநூலோடு பகிர்ந்து கொள்ளப்படும், ஒத்துக் கொண்டால் வாட்சப்பைப் பயன்படுத்து இல்லாவிட்டால் வெளியே போ என்று அறிவித்திருப்பதில் ஏகப்பட்ட குழப்பங்கள், சர்ச்சைகள் உருவாகியிருக்கின்றன

வீடியோ 14 நிமிடம்  கொஞ்சம் விரிவான தகவல்களோடு.

அரக்கர்களால் ஆட்டுவிக்கப்படும் உலகு என்று கார்ல் சாகன் அன்றே சொன்னார் என்று ஒருவர் பெருமிதப் படுவதா? பொருமுவதா? நிம்மதி உங்கள் சாய்ஸில் தான் இருக்கிறது என்பது மட்டும் நிச்சயம்!

நண்பர் பந்து ஏற்கெனெவே முகநூல் என்னென்ன விவரங்களை சேகரிக்கிறது, எப்படிப் பயன் படுத்துகிறது என்பதை விளக்கும் நெட்பிளிக்சின்  The Great Hawk  டாகுமெண்டரியை சிபாரிசு செய்திருந்ததில், பார்த்துக் கொஞ்சம் விவரங்களைத் தெரிந்து கொண்டிருந்தேன் ட்வீட்டர் அல்லது முகநூல் தங்களது வாடிக்கையாளர்களை எப்படிப் பயன்படுத்திக் கொள்கின்றன என்பது  முன்பே தெரிந்த விஷயம் என்பதால், வாட்சப்பை முற்றிலும் நிராகரிப்பதில் எனக்குக் கொஞ்சமும் தயக்கமில்லை.

       

வாட்சப்புக்கு மாற்றாக, டெலிகிராம், சிக்னல் என்று பல அப்ளிகேஷன்கள் கிடைக்கும் போது முகநூல் வாட்சப் என்று இன்னமும் கட்டிக்கொண்டு அழவேண்டும்?

மீண்டும் சந்திப்போம்.

விடைபெறும் #2020 வரவிருக்கும் #2021 #தேர்தல்களம்

2020 ஆம் ஆண்டு நிறையக் களேபரங்களுடன் ஒருவழியாக இன்றுடன் முடிகிறது. 2021 என்று புதிய ஆண்டு துவங்க இருக்கும் வேளையில், நாம் எந்த அளவுக்குத் தயாராக இருக்கிறோம்? நம்மில் ஒவ்வொருவருக்கும் ஒவ்வொருவிதமான மனோநிலை, கருத்து இருக்கும். கார்டூனிஸ்ட் மஞ்சுள் இப்படித் தனது கருத்தைச் சொல்கிறார்.

கொரோனாதாக்கம், பாதிப்பு இன்னும் சிலகாலத்துக்கு நீடிக்கும் என்றுதான் சொல்கிறார்கள். அதற்காக இடிந்துபோய் உட்காரவேண்டியதும் இல்லை. முகக்கவசம், சானிடைசர், இப்படி சில முன்னெச்சரிக்கைகளோடு கொரோனாவுடன் வாழப்பழகிக் கொள்ளவேண்டியதுதான்! வேறு வழி? !! 

ஸ்டேன்லி ராஜன் வழக்கம் போலத் தனது கூர்மையான வார்த்தைகளில் என்ன சொல்கிறாராம்?

கொரோனாவின் பாதிப்பு விமான போக்குவரத்து சுற்றுலா போன்றவற்றை அடியோடு சாய்த்திருப்பதும், வாழ்வே புதிய இயல்புக்கு மாறி இருப்பதும் இந்த ஆண்டு கொடுத்த அதிர்ச்சிகள்

தமிழகத்தை பொறுத்தவரை 2020லும் எதிர்கட்சி வழக்கம் போல் காமெடி சொதப்பல்களை செய்தது, எந்த நெருக்கடியும் அவர்களால் கொடுக்கமுடியவில்லை

பழனிச்சாமி தன் 5ம் வருடத்தை பூர்த்தி செய்து தேர்தலுக்கும் வந்துவிட்டார்

2020ல் தமிழகம் கண்ட மிகபெரும் முடிவு ரஜினி அரசியலுக்கு வரவில்லை என்பது, ஒருவழியாக அந்த புயல் கரையினை கடக்காமலே கரைந்து விட்டது.

2021 தமிழகத்தில் தேர்தல் வருடம், அது என்னாக போகின்றது என்பதை காலமே காட்டும்

2020ல் பள்ளி விடுமுறை ஆண்டு முழுக்க தொடர்ந்ததில் மாணவ சமுதாயமும் முககவசம் மற்றும் சானிட்டைசர் தயாரிப்பாளர்கள் மட்டும் மகிழ்ச்சி, வேறு எந்த தரப்பும் அவ்வளவு மகிழ்ச்சியாக இல்லை எல்லாம் கொரோனா செய்த கோலம் உலகம் புதிய வாழ்வியல் முறைக்கு மாறிவிட்டது   முழுப்பகிர்வையும் படிக்க இங்கே  

 

இன்றைய ஹிந்து ஆங்கிலநாளிதழில் ரஜனிகாந்த் அறிவிப்பைக் கிண்டல் செய்து சுரேந்திரா வரைந்த ஒரு கார்டூனுடன் என் ராம் கும்பலுக்கு இந்த ஆண்டு விடைபெறுகிறதாம்! தினமலர் நாளிதழில் கூட ரஜனியைக் கிண்டல் செய்கிற மாதிரி கேலிப்படங்கள் வந்துகொண்டிருக்கிறதாம். அவர்களைக் குறை சொல்லிப்பயனில்லை! களிமண் கால்களுடைய ஒருவர் இப்படி வீராவேசமாக நான் அரசியலுக்கு வருவது உறுதி. இப்ப இல்லைன்னா எப்பவுமே இல்லை என்று டயலாக் பேசிவிட்டு , பின்வாங்கினால் வேறென்ன நடக்குமாம்?

சுத்திச் சுத்தி வந்தீக என்று ஜோடிபோட்டு டூயட் பாடியவருக்கு, இதெல்லாம் தேவைதான்! 

Stanley Rajan

நேற்று, பிற்பகல் 2:55  · 

கொரோனா செய்த கொடுமைகள் நிறைய உண்டு என்றாலும் அது செய்த நல்ல விஷயம் இந்த ஆண்டு முழுக்க தமிழக சினிமா இம்சைகளை முடக்கி வைத்தது

இல்லையேல் இந்நேரம் இந்த ஆண்டின் சிறந்தபடம், சிறந்த இயக்குநர், சிறந்த புதுமுகம், சிறந்த புது மூக்கு, கண் என ஆளாளுக்கு பட்டியலிட்டு பெரும் களபேரம் செய்து கொண்டிருப்பார்கள்

கொரொனா அடித்த அடியில் எல்லோரும் மகா அமைதி

ஆக தியேட்டர்கள் அடைபட்டால் தமிழகத்தில் பெரும் அமைதி நிலவும் என்பது தெரிகின்றது, திராவிட கட்சி இம்சைகளுக்கு முன்பு தமிழக சினிமாவோடு தமிழகம் எவ்வளவு நிம்மதியாக இருந்தது என்பது இப்பொழுதுதான் புரிகின்றது.

இந்த கொரோனா ஒழியட்டும் ஆனால் சினிமா உலகத்தை மட்டும் முடக்கி வைக்கும் புதிய வகை கொரோனா உருவாகி வரட்டும், அப்படி ஒன்று வந்தால் நிச்சயம் வரவேற்கலாம் 

கொரோனாவால் விளைந்த நல்ல விஷயங்களில் ரஜனி ஜகா வாங்கியதைச் சொல்லாமல் விட்டுவிட்டாரே! அது இன்னமும் உறுத்தலாய்த் தான் இருக்கிறது.

திமுக எம்பி கிச்சுகிச்சு மூட்டுகிறார்! KDbrothers பற்றி அவருக்கு அவ்வளவாகத் தெரியாது போல இருக்கிறது. அவர்கள் திமுகவில் இருப்பதே விசுவாசத்தினால் அல்ல! வியாபாரத்துக்காகத்தான் என்பது கூடாது தெரியாத இவரெல்லாம் எப்படித் திமுக எம்பியானார்?

புதிய ஆண்டில் மீண்டும் சந்திப்போம்.    

#பாரதிகவிதைகள் சில தெளிவுகள்! படித்ததில் பிடித்தது!

நல்லதொரு வாசிப்பு அனுபவத்துக்கு காலம் தடையாக இருந்ததே இல்லை என்பதை இன்றைக்கு முகநூலில் பார்த்த ஒரு மீள்பதிவு, அதற்கு இன்னும் வலுசேர்த்த ஒரு பின்னூட்டம் எனக்குப் புரிய வைத்தது. வாசிக்கிறேன், வாசிப்பை நேசிக்கிறேன் என்ற பெயரில் புத்தகங்களுக்கு தத்துப்பித்து விமரிசனங்களாக எழுதிக் குவித்துக் கொண்டிருப்பதையும் பார்த்துக் கடந்து கொண்டிருக்கிற நேரத்தில் இந்த மாதிரி அற்புதமான பகிர்வைப் படித்தால் உவகை ஏன் பெருகாது!! 

 Jataayu B'luru

23 டிசம்பர், முற்பகல் 8:18  · 

"ஹிந்து மத சாரம் அறிந்தவன் பாரதி அவன் சொல்லியிருக்கிறான் இயேசுவின் உயிர்த்தெழுதல் குறித்து" என்கிறார் Venkateswaran Chittor Venkatsubramanian.  சும்மா மேம்போக்காக பாரதி பாடல்களைப் படித்த நினைவில் சொல்லப்படும் அபத்தமான, சாரமற்ற கூற்று இது. 

இயேசு கிறிஸ்து என்று தலைப்பிட்ட மூன்று பாடல்கள் கொண்ட அக்கவிதையில் பாரதி சொல்லும் "உயிர்த்தெழுதல்" சமாசாரத்திற்கும் கிறிஸ்துவ மதக்கோட்பாட்டிற்கும் கிஞ்சித்தும் சம்பந்தமில்லை.  உண்மையில் அந்தக் கவிதையில்  இயேசு சிலுவையில் அறையப்பட்டு *மாண்டு போவதையும்* பின்பு *உயிர்த்தெழுவதையும்*  முற்றிலும்  இந்து தத்துவ சிந்தனைப் போக்கின் அடிப்படையில்  குறியீட்டு ரீதியாக பாரதி re-interpret செய்கிறார் என்பதை அதை வாசிப்பவர்கள் எளிதாகவே உணர முடியும். கிறிஸ்தவர்கள்  நம்புவதைப் போல அதை ஒரு வரலாற்று சம்பவமாகவோ அல்லது  அதன்மூலம் இயேசு அனைவரது பாவங்களை ரத்தத்தால் கழுவியதாகவோ எல்லாம் பாரதி கருதவில்லை. சிலுவையில் அறைவது என்பது அகந்தையைக் கொல்லுதல் என்ற அளவிலேயே சித்தரிக்கிறார்.  

ஈசன் வந்து சிலுவையில் மாண்டான்,

எழுந்து யிர்த்தனன் நாள் ஒரு மூன்றில்;

நேசமா மரியாமக்த லேநா

நேரிலே இந்தச் செய்தியைக் கண்டாள். 

தேசத் தீர்! இதன் உட்பொருள் கேளீர்:

தேவர் வந்து நமக்குட் புகுந்தே

நாசமின்றி நமை நித்தங் காப்பார்,

நம்அகந்தையை நாம்கொன்று விட்டால்.   (1) 

கவிதை முழுவதும்,  முதலில் அதிகம் அறியப்படாமலிருந்து, பின்பு அண்மைக்காலங்களில் டாவின்சி கோட் திரைப்படம் மூலம் மிகவும் பிரபலமாக அறிய வந்த மரியா மக்தலேனா (Mary Magdalene) என்ற பைபிள் கதாபாத்திரத்தை  பாரதி கொண்டு வந்திருக்கிறார். 

அன்புகாண் மரியா மக்தலேநா,

ஆவி காணுதிர் யேசு கிறிஸ்து;

முன்பு தீமை வடிவினைக் கொன்றால்

மூன்று நாளினில் நல்லுயிர் தோன்றும்;

பொன்பொலிந்த முகத்தினிற் கண்டே

போற்றுவாள் அந்த நல்லுயிர் தன்னை

அன்பெனும் மரியா மக்தலேநா

ஆஹ! சாலப் பெருங்களி யிஃதே.  (2) 

ஏசு சிலுவையில் அறையப் பட்டதை "தீமை வடிவினைக் கொல்லுதல்" என்று இந்தப் பாடலில் பாரதி கூறுகிறார். எந்தக் கிறிஸ்தவ மதப்பிரிவுக்காவது இந்தக் கருத்து ஏற்புடையதாகுமா என்ன? 🙂 

உண்மை யென்ற சிலுவையிற் கட்டி

உணர்வை ஆணித் தவங்கொண் டடித்தால்,

வண்மைப் பேருயிர் யேசு கிறிஸ்து

வான மேனியில் அங்கு விளங்கும்

பெண்மைகாண் மரியா மக்த லேநா,

பேணும் நல்லறம் யேசு கிறிஸ்து.

நுண்மை கொண்ட பொருளிது கண்டீர்

நொடியி லிஃது பயின்றிட லாகும். (3) 

The Passion of Christ போன்ற படங்களின் வாயிலாக சிலுவையில் அறைதல் என்ற காட்சியை ரத்தமும் சித்ரவதையும் வலியும் வன்முறையும் நிரம்பியதாக, உணர்ச்சிவசத்தை உண்டாக்குவதாக கிறிஸ்தவர்கள் தொடர்ந்து பிரசாரம் செய்துவருகின்றனர். ஆனால், பாரதி அது ஒரு குறியீடு மட்டுமே என்பதை மீண்டும் இந்தப் பாடலில் வலியுறுத்துகிறார்.  சிவபெருமான் திரிபுரங்களை எரித்த புராணத்தைக் குறித்து "முப்புரம் செற்றனன் என்பர் மூடர்கள்;  முப்புரமாவது மும்மல காரியம்" என்று திருமூலர் கூறும் அதே வகையான விளக்கம் தான் இது.   அத்துடன் மக்தலேநா - இயேசு இணையை  பெண்மை - அறம் என்பதன் வாயிலாக பிரகிருதி - புருஷன் (சாங்கிய தரிசனம்), சிவ - சக்தி, சீன மதங்களின் யிங் - யாங் என்பது போன்ற ஒன்றாக பாரதி சித்தரிக்க முயல்கிறார். இத்தகைய குறியீட்டாக்கம் மூலமாக கிறிஸ்தவ மதத்தில் உள்ள மதமாற்ற/ஆக்கிரமிப்பு  வெறித்தனத்தை கொஞ்சம் நீர்த்துப் போகச் செய்யலாம் என்று பாரதி கருதியிருக்க வாய்ப்பிருக்கிறது.  ஏனென்றால் கிறிஸ்தவ மதமாற்றம்,  கிறிஸ்தவ பள்ளிகள் செய்யும் கலாசார/பண்பாட்டு அழிப்பு ஆகியவை பற்றி மிகவும் தீவிரமாகவும் காட்டமாகவும் தனது கட்டுரைகளில் பாரதி எழுதியிருக்கிறார் (உதாரணமாக, மிஷன் பள்ளிகளை விலக்கி வைத்தல் என்ற இந்தக் கட்டுரை -  https://goo.gl/wF6SRx). 

சர்ச் அதிகாரபீடம், மதவெறி, ஆக்கிரப்பு, காலனியம் ஆகியவை அடங்கிய கிறிஸ்தவத்தின் கோர முகத்திலிருந்து  இயேசு கிறிஸ்து என்ற ஆன்மீக ஞானியை மட்டும் தனியாகப் பிரித்தெடுக்கும் சாத்தியம் இருக்கிறது  என்ற எண்ணம் கொண்டவர்களாக 19-20ம் நூற்றாண்டுகளின் பல இந்திய சிந்தனையாளர்களும், ஞானிகளும், ஆன்மீகவாதிகளும் இருந்துள்ளனர்.  ஸ்ரீராமகிருஷ்ணர், ஸ்ரீ ரமண மஹரிஷி, ஸ்ரீஅரவிந்தர் போன்றவர்களின் கருத்துக்களில் கூட இத்தகைய இழையைக் காணமுடியும். அதன் தாக்கமே இந்தப் பாரதி கவிதையிலும் உள்ளது. இவ்வாறான ஒருவகை நல்லெண்ணத்துடன் அவர்கள் முன்வைத்த கருத்துக்கள் உண்மையில்  கிறிஸ்தவ மனநிலையில்  பெரிய அளவில் எந்தவகையிலும் மாற்றத்தை ஏற்படுத்தவில்லை. அதில் ஆச்சரியமே இல்லை. மாறாக, அப்பாவி இந்துக்களைக் குறிவைத்து செய்யப் படும் கிறிஸ்தவ மதமாற்ற பிரசாரங்களில்  அந்த சான்றோர்களின் கருத்துக்கள் செலக்டிவ்வாக எடுத்தாளப் பட்டு கிறிஸ்தவத்தால் இன்றளவும் துஷ்பிரயோகம் செய்யப் பட்டு வருகின்றன.  அதுதான் கண்ட பலன். 

நமது சமகாலத்தில் கிறிஸ்தவ/இஸ்லாமிய மதங்களையும் அவற்றின் சில கூறுகளையும்  நல்லிணக்கம் என்ற பெயரில் சும்மாவாவது  புகழ்ந்துரைக்கும் இந்து ஆன்மீகத் தலைவர்கள், அறிஞர்கள், சொற்பொழிவாளர்கள் ஆகியோர் இதிலிருந்து பாடம் கற்க வேண்டும். அத்தகைய தேவையற்ற புகழ்ச்சிகளை முற்றிலுமாகத் தவிர்க்க வேண்டும்.   பரம சத்தியமும் என்றும் நிலைத்திருக்கும் தர்மமுமாகிய இந்துமதத்தின் கருத்துக்களை  நேரடியாக உள்ளது உள்ளபடி எடுத்துரைத்தாலே போதும்; உண்மையான ஆன்மீக நாட்டமும்,  இந்துப் பண்பாட்டின் மீது மரியாதையும் கொண்ட கிறிஸ்தவர்களும், முஸ்லிம்களும் தாமாகத் தேடி வருவார்கள். அப்படி வருபவர்களை ஏற்கவும், இந்து ஆன்மீகத்திலும், இந்து சமூகத்திலும் முறையாக சேர்க்கவுமான வழிகளையும் கட்டமைப்புகளையும் உருவாக்குவதே  இந்து ஆன்மீகத் தலைவர்களின் பணியாக இருக்கவேண்டும். அதைவிட்டு, சும்மா அன்னிஇன்னும் ய மதங்களின் கூறுகளைப் புகழ்வதால் எந்த நல்லிணக்கமும் ஏற்படாது.  அத்தகைய புகழ்ச்சிகள் இந்துக்களை மேலும் குழப்பவே பயன்படுத்தப் படும். :

(மீள்பதிவு. முதற்பதிவு December 23, 2018. நன்றி Facebook Memories)  

இந்தப்பகிர்வுக்கு வந்திருக்கும் ஒரு பின்னூட்டம் இன்னும் கொஞ்சம் மெருகேற்றுவதைப் பாருங்கள்: 

Rajam B Rajambalasubramanian

உண்மையே. நிகழ்ச்சிக்கு முக்கியத்துவம் கொடுக்காமல் அவர் " தத்துவத்திற்குத் தான் முக்கியம் கொடுத்தார் என்பதை பின்வரும் பாடல்கள் மூலம் தெளிவாகிறது

#நோவாலே மடிந்திட்டான் புத்தன் கண்டீர்

அந்தணனாம் சங்கராசார்யன் மாண்டான்

அதற்கடுத்த ராமனுஜனும் போனான்!

சிலுவையிலே அடியுண்டு யேசு செத்தான்

தீயதொரு கணையாலே கண்ணன் மாண்டான்

பலர் புகழும் இராமனுமே யாற்றில் வீழ்ந்தான்

பார் மீது நான் சாகாதிருப்பேன் காண்பீர்!

மலிவுகண்டீர் இவ்வுண்மை பொய் கூறேன் யான்,

மடிந்தாலும் பொய்கூறேன் மானுடர்க்கே

நலிவுமில்லை, சாவுமில்லை, கேளீர், கேளீர்.

இது ஒரு தத்துவப் பாடல். புத்தன், ஏசு, ராமன், கிருஷ்ணன் ஆகிய அனைவரும் இயற்கைக்கு மாறான மரணம் அடைந்தனர். ஆனாலும் ஆன்மா அழியாது. அவர்களுடைய பூத உடல் அழிந்தாலும் புகழ் உடம்பு நீடிக்கிறது. இந்தப் பொருளிலேயே பாரதியும் நான் சாகாதிருப்பேன் என்கிறார்.

#பூமியிலே, கண்டம் ஐந்து, மதங்கள் கோடி!

புத்த மதம், சமண மதம், பார்ஸி மார்க்கம்,

சாமியென யேசுபதம் போற்றும் மார்க்கம்,

சநாதனமாம் ஹிந்துமதம், இஸ்லாம், யூதம்,

நாமமுயர் சீனத்துத் ‘தாவு’மார்க்கம்

நல்ல ‘கண்பூசி’ மதம் முதலாப் பார்மேல்

யாமறிந்த மதங்கள் பல உளவாம் அன்றே;

யாவினுக்கும் உட்புதைந்த கருத்திங்கொன்றே.

எல்லா மதங்களும் “சாமி நீ, சாமி நீ, கடவுள் நீயே, தத்வமஸி, தத்வமஸி, நீயே அஃதாம்” — என்று அடுத்தவரிகளில் சொல்லி, பெரிய அத்வைத கருதுக்களை “தத்வமஸி” என்ற உபநிஷத வாக்கியம் மூலம் போதிக்கிறார்.

இத்தகைய தத்துவப் பாடல்களை எடுத்துக் கொண்டு " ஏசு கிறிஸ்துவத்தை ஆதரித்தார் என விஷமப் பிரச்சாரம் செய்கிறது மெஷினெரிகள் 

வாசிப்பு அனுபவமும் ருசியும் பெரிதிலும் பெரிதுகாண் என்று சொல்வதைத்தவிர வேறென்ன சொல்லிவிட முடியும் சொல்லுங்கள்! 

எங்கள்Blog ஸ்ரீராமுக்காக ஒரு ஸ்பெஷல் பதிவு!

சரியாகப் பிரசங்கம் கூடச் செய்யத் தெரியாத எஸ்ரா சற்குணம் எப்படிப் பாதிரியானார், எப்போது பேராயர் ஆனார் என்பதெல்லாம் கிறித்தவர்கள் படவேண்டிய கவலை! இந்தப் பாதிரி எப்படி திமுகவின் ஆஸ்தானப் பேச்சாளராக நீடிக்கிறார் என்பது ஒரு அரசியல் கேள்வி என்பதை எவராலும் மறுக்க முடியாதே! முந்தைய பதிவில் எஸ்ரா சற்குணம் திமுகவுக்கு பிரசார பீரங்கியாக செயல் படுவதை விட, திமுகவின் மீது வெறுப்பும் அதிருப்தியும் அதிகரிப்பதற்கே உளறிக் கொண்டிருக்கிறார் என்பதை ஒரு கோடி காட்டியிருந்தேன். வின் டிவியில் இருந்து விலகி, பிஜேபியில் சேர்ந்த மதன் ரவிச்சந்திரன் இப்போது மதன் டயரி என்று தனியாக ஒரு யூட்யூப் சேனலை ஆரம்பித்திருக்கிறார். அதில் நேற்றிரவு எஸ்ரா சற்குணத்துடன்  சுடச்சுட ஒரு நேர்காணலை வெளியிட்டு இருக்கிறார். 

இந்த 36 நிமிட நேர்காணலில் எஸ்ரா சற்குணம் உளறல் கொஞ்சமல்ல, மொத்தமும் அதுவே தான்! இவர்களைத் திருத்தமுடியாது, ஆனாலும் காமெடியை ரசிக்கலாம் இல்லையா! மதன் குறிப்பிட்டு எழுப்புகிற கேள்விகள், சொல்லப்படும் பதில்களில் இந்தக் கோமாளிப் பாதிரிக்கு கிறித்தவத்தில் இருக்கும் கோளாறுகளைப் பற்றி ஏதாவது தெரியுமா என்பதே பெரும் குழப்பம் அந்த வகையில் பார்த்தால் திமுகவுக்கு மிகவும் பொருத்தமான வசைப் பேச்சாளர் தான் என்பதில் சந்தேகம் இல்லை! ஆனால் இவரால் திமுகவுக்கு எத்தனை கிறித்தவ ஓட்டுக்கள் கிடைத்துவிடும்? எப்படி இவரையும் ஒரு பொருட்டாக நம்புகிறார்கள்? 

தயாநிதி மாறன் ஏதோ தெரியாமல் பாமகவின் ராமதாசு, அன்புமணி இருவர் மீதும் கூட்டணி சேர்வதற்கே பலநூறு கோடிகளில் பணம் கேட்டு பேரம் பேசுவதாக, சொல்லிவிட்டார் என்று சொல்ல முடியுமா? துரைமுருகன் ஆசைப்படுவது போல திமுக கூட்டணிக்கு பாமக வந்துவிடக்கூடாது என்பதற்காக  வேண்டும் என்றே பாமகவைச் சீண்டிப்பார்த்தது மாதிரித் தெரிகிறதோ? தயாநிதியின் மனக்கிடக்கை எதுவானாலும், பின்விளைவென்னவோ பாமக இதற்கு மேலும் திமுக கூட்டணிக்குள் வராது என்பது தான்! அப்படியே வந்தாலும் சில நூறு கோடிகளில் அல்ல, சில ஆயிரம் கோடிகளில் தான் பேரம் இருக்குமோ? யாருடன் யார் கூட்டு என்பதில் தயாநிதி மாறனுடைய பேச்சு, பாமகவுக்கு ஒரு இக்கட்டான சூழ்நிலையை உருவாக்கி விட்டது. இனிமேல் அங்கும் இங்கும் போய்விடுவதாகப் போக்குக்காட்ட முடியாது. தவிர அதிமுகவிலும் கூட பாமகவுக்கு அதிக இடம் கொடுத்துவிடக்கூடாது என்ற குரல் வலுத்துவருவதாகவும் தெரிகிறது. இக்கட்டான இந்தச் சூழ்நிலையை மருத்துவர் ராமதாசு எப்படி சமாளிக்கப் போகிறார்? 20% வன்னியர் இட ஒதுக்கீடு கோரிக்கை,போராட்டத்தை அடுத்த தேர்தலில் பார்த்துக் கொள்ளலாம் என்று கைவிடப்போகிறாரா? துணை முதல்வர் போன்ற அதீதமான கோரிக்கைகள், சீட்டுகள் என வற்புறுத்தாமல் தகுதிக்குத் தகுந்த எள்ளுருண்டை கிடைத்தாலே போதுமென்று பதுங்கப்போகிறாரா? OR அன்புமணி4CM என்ற பழைய கோஷத்தை முன்னிறுத்தி, தனித்தே களம் காணப்போகிறாரா? 

எப்படி முடிவெடுத்தாலும் அது பாமகவுக்கு மட்டுமல்ல, இடதுசாரிகள், விசிக, மதிமுக போன்ற உதிரிகளுக்கும் கூட்டணி யாருடன் என்பதில் பெரிய குழப்பத்தையும் சேர்த்தே கொண்டு வந்திருக்கிறது

கமல்காசருக்கு அசாதுதீன் ஒவைசி கூட்டு நிச்சயம்! சீமான் தனித்தே நிற்பாரா அல்லது ஒவைசியுடன் கூட்டு என்று போவாரா? #அண்ணாத்த படப்பிடிப்பு கொரோனா பீகியால் நிறுத்தப்பட்டதில் ரஜனிகாந்த் சென்னை திரும்பிவிட்டாரா? டிசம்பர் 31 அன்று கட்சி பற்றி அறிவிப்பு இருக்குமா? ஜனவரியில் மெய்யாலுமே கட்சி ஆரம்பித்து விடுவாரா? இப்படி ஏகப்பட்ட கேள்விகளுக்கு விடை கிடைக்காமலேயே தமிழக அரசியல்களம் சூடுபிடித்து விட்டதாக எப்படிச் சொல்வது ஸ்ரீராம்?  

ஸ்ரீராம்.December 24, 2020 at 6:06 AM

ஆக, அரசியல் களம் சூடு பிடிக்கிறது!

ReplyDelete

Replies

1. 
   கிருஷ்ண மூர்த்தி SDecember 24, 2020 at 10:28 AM

   சரியான பதத்துக்கு, சூடுபிடிக்க பிப்ரவரி, மார்ச் மாதம் வரை காத்திருக்க வேண்டும் ஸ்ரீராம் !

2. 
   

                             . 

#புத்தகங்கள் காலத்தின் கண்ணாடியா? அல்லது எழுதியவன் மனக்குழப்பங்களா? எது சரி?

வினய் சீதாபதி எழுதி சமீபத்தில் வெளியாகியிருக்கிற புத்தகம் : Jugalbandi: The BJP Before Modi பெங்குவின் வெளியீடாக நவம்பர் 23 அன்று வெளியான இந்தப் புத்தகம், இதுவரை வெளியான விமரிசனங்களை, தகவல்களை வைத்துப் பார்க்கும் போது, நான் வாசிக்க விரும்பும் புத்தகங்களில் இது முதலிடத்தில் இருக்கிறது என்று இன்னொரு வலைப் பக்கங்களில் எழுதிப் பதினெட்டு நாட்கள் தான் ஆகியிருக்கிறது. The Wire தளத்தில் கரண் தாப்பர், நூலாசிரியருடன் அவர் சொல்ல வந்ததையும் தாண்டி வார்த்தைகளை வலுக்கட்டாயமாக வாயில் திணிக்க முயற்சி செய்கிற ஒரு 54 நிமிட பேட்டி வெளியிடப்பட்டிருக்கிறது.

 மேலே வெறும் ஸ்க்ரீன்ஷாட் மட்டும்தான்!  ஒரிஜனல் வீடியோ இங்கே  

In an interview that will create considerable controversy and perhaps provoke the wrath of Bharatiya Janata Party supporters, the author of a recent study of Atal Bihari Vajpayee and Lal Krishna Advani has claimed that in 1998, when he was 33 and a young MLA, now Union home minister Amit Shah had been critical of the nuclear tests என கரண் தாப்பர் தன்னுடைய மனக் கிடக்கையை வெளிப்படையாகவே சொல்லி விடுகிறார். Vinay Sitapati, the author of Jugalbandi, an account of the Vajpayee-Advani relationship, and who teaches at Ashoka University, claims that in 1998 Amit Shah wrote to prime minister Vajpayee sharply criticising the nuclear tests.In his alleged letter he wrote: “Respected Vajpayee Ji, because of your greed for publicity you have forever lost Pakistan Occupied Kashmir”. Sitapati adds that when Vajpayee summoned him to Delhi for an explanation Shah told him that Morarji Desai had told him: “If we both (India and Pakistan) become nuclear powers, we can never win back PoK through war”.

இந்தப் புத்தகத்தைப் படிக்கவேண்டுமென்கிற ஆவலை கரண் தாப்பர் போன்ற ஊடகக்காரர்கள் கொஞ்சமும் குறைத்து விடவில்லை என்பதே என்னுடைய கருத்தாக இருக்கிறது.  

"ஒரு நல்ல எழுத்தாளன், தான் வாழும் காலத்தின் பிரதிபலிப்பாகவே இருக்கிறான். அவனைப் பாதித்த விஷயங்கள், சமூகத்தில் அவன் பார்த்த, அவனைப் பாதித்த நிகழ்வுகள், அவனுடைய ஆதங்கத்தோடு சேர்ந்தோ, அல்லது அவன் புரிந்து  கொண்ட விதத்தை ஒட்டியோ தான் அவன் படைப்புக்கள் இருக்கும். மனிதனை நேசிக்கத் தெரிந்த எழுத்தாளர்கள் அனைவரிடத்திலும் காணக் கிடைக்கிற பொதுவான பண்பு இது". இப்படி 10 வருடங்களுக்கு  முன்னால் ஆலிவர் ட்விஸ்டும் ஏய்ப்பதில் கலைஞனும்...!  என்ற தலைப்பில் இன்னொரு வலைப்பக்கங்களில் எழுதியதை இன்றும் நான் உறுதியாக நம்புகிறேன். ஆனாலும் இப்போது எழுதிக் குவிக்கப்படும் புத்தகக் குப்பைகள் தவறான தகவல்களை வாசிப்பவர் மீது திணிப்பதற்காகத் தெரிந்தே செய்யப்படுபவை என்பதை சேர்த்தே சொல்லியிருக்க வேண்டுமென்று தோன்றுகிற அளவுக்கு disinformation பல்கிப் பெருகிக் கொண்டிருக்கிறது.    

சரி! இப்போது எதற்காக பழைய கதை என்று கேட்கிறீர்களா?புஸ்பா புருசன் காமெடி மாதிரி சுனந்தா புஷ்கரைத் திருமணம் செய்து கொண்டதாலேயே மிகப்பிரபலமும் ஆனவரும் சோனியா காங்கிரசின் MPயுமான சசிதரூர்  Battle of belonging என்ற தலைப்பில் புத்தகம் எழுதி அது கடந்த அக்டோபரில் வெளியாகியிருக்கிறது.இந்தத்தகவலே Outlook தளத்தில் நடப்பு இதழில் வெளியான புத்தக விமரிசனம் பார்த்த பிறகுதான் தெரிய வந்ததென்றால் பார்த்துக் கொள்ளுங்களேன்!  புஸ்பா புருசன் மவுசு போய்விட்டதா என்ன?😂😂

சசி தரூர் 220 வருஷ அரதப்பழசான ஒரு  ஆங்கிலப் புத்தகத்திலிருந்து ஒரு வாக்கியத்தைப் பிடித்துக் கொண்டு, தப்பு மேல் தப்பாகத் தன்னுடைய வாதங்களை இந்தப் புத்தகத்தில் அடுக்கிக் கொண்டே போகிற மாதிரி இருக்கிறது.

Shashi Tharoor’s brilliant but deeply flawed thesis in The Battle of Belonging takes off from where G.K Chesterton left it off long back when he said: “‘My country, right or wrong’, is a thing that no patriot would think of saying except in a desperate case. It is like saying, ‘my mother, drunk or sober’.” (செஸ்டர்டன் The Defendant என்ற புத்தகத்தில் எழுதியது 1901 இல்)  Tharoor is brilliant with words, which he uses not to convince but to confuse, obfuscate and deceive. He writes brilliantly, except this time around his core arguments are fundamentally flawed. 

Tharoor fails to examine the counterfactual in any great detail—why can’t a nationalist be a patriot, or a patriot a nationalist if they meet some, but not all, of the elements of his own definitions? For example, if someone criticises the government’s policies and still admires an authoritarian leader is he a nationalist or a patriot as per the Tharoorian construct?  என்று ஸ்ரீவத்ச கிருஷ்ணா விமரிசனமாக எழுதுவதிலேயே இந்த 462 பக்கப் புத்தகத்தை ரூ.799/- கொடுத்து வேண்டாத குழப்பம் தலைவலியையும் சேர்த்தே வாங்கியாக வேண்டுமா என்ற எண்ணம் வலுவாக எழுகிறதா இல்லையா? 

புத்தகங்கள் நல்லவைதான்! வலிமையானவைதான்! நல்லதும் வலிமையும் எப்படிப்பட்ட புத்தகங்களைத் தேடிப் படிக்கிறோம்? திரித்துச் சொல்லும் குப்பைகளை எந்த அளவுக்கு நிராகரிக்கிறோம் என்பதில் தான் இருக்கிறது!

மீண்டும் சந்திப்போம்.