இஸ்ரேல் தேர்தல்களும்! இந்தியா கற்றுக்கொள்ள வேண்டியதும்!

ஒரு 40/45வருடங்களுக்கு முன்னால் தினமணி ஆசிரியர் AN சிவராமன் கணக்கன் கட்டுரைகள் என்று தினமணி நாளிதழில் தொடர்கட்டுரைகளாக எழுதிக் கொண்டிருந்த விஷயங்களில் முக்கியமான ஒன்று தேர்தல் சீர்திருத்தங்கள்! தேர்தல் சீர்திருத்தங்களாகச் செய்ய வேண்டியது எவை என்று தன்னுடைய கருத்தாக எதையும் திணிக்கவில்லை. மாறாக தேர்தல் ஜனநாயகத்தைப் பின்பற்றும் பல நாடுகளில்  உள்ள வித்தியாசமான தேர்ந்தெடுக்கும் விதத்தை வாசகர்கள் புரிந்துகொள்ள உதவியாக எளியமுறையில் எழுதிய கட்டுரைகள் அவை! வலைக் குழுமங்களிலும் இங்கே பதிவுகளிலும் தொடர்ந்து எழுதிக் கொண்டிருப்பதற்கு முக்கியமான உந்துகோலாகக் கணக்கன் கட்டுரைகள் இருந்தன 

இங்கே காங்கிரசுக்கு ஆதரவாகவே பேசி வரும் The Print தளத்தின் சேகர் குப்தா , காங்கிரஸ் கட்சியின் கோமாளித் தனங்களைப் பேசவேண்டி வந்துவிடுமோ என்ற பயத்திலோ அல்லது என்னதான் இருந்தாலும் ஒரு சீனியர் பத்திரிகையாளர், இந்தியன் எக்ஸ்பிரஸ் நாளிதழின் ஆசிரியர் பொறுப்பிலும் இருந்தவர் என்ற முறையிலோ சென்ற மாதம் நடந்து முடிந்த இஸ்ரேல் பொதுத்தேர்தல் முடிவுகளைப் பற்றிக் கொஞ்சம் விரிவாகவே இந்த 24 நிமிட வீடியோவில் பேசுகிறார். கொஞ்சம் கவனமாகக் கேளுங்கள், சேகர் குப்தாவின் காங்கிரஸ் ஆதரவெல்லாம்  ஒருபக்கம் கிடக்கட்டும், இஸ்ரேலியத் தேர்தல்களை, அதன் fractured முடிவுகளில்   உள்ள சிக்கல்களை, ஒரு அனுபவம் உள்ள பத்திரிகையாளராக  மிக நேர்த்தியாக விளக்குவதைப் புறந்தள்ளி விடமுடியுமா?   

ஜனநாயக முறைகளே மிகச் சமீபத்தைய  காலவரவுதான் என்பதால் கொஞ்சம் குறைகள் இருக்கத்தான் செய்கின்றன. கவனித்துச் செம்மை செய்துகொண்டே வருவதில் தான் அதன் முழுமையான வளர்ச்சியும்,பலனும் ஜனங்களுக்குக் கிடைக்கும் என்பது குன்சாவாக எல்லோருமே புரிந்து கொள்ளக் கூடிய ஒன்றுதான்! உதாரணமாக இங்கே இந்தியாவில் பிரிட்டனிடமிருந்து இரவல் வாங்கிய Westminster தேர்தல் முறையைப் பயன் படுத்துகிறோம்! Winner takes all என்பது இந்த முறையின் முக்கியமான அம்சம்! இந்த அம்சத்தின் அடிப்படையில் பிரிட்டனில் நடந்துமுடிந்த brexit பொதுஜன வாக்கெடுப்பில் 51% வாக்குகள் பெற்று ஐரோப்பிய ஒன்றியத்தை விட்டு வெளியேறுவது என்ற முடிவைச் செயல் படுத்த முடியாமல் இன்னமும் பிரித்தானிய அரசியல் தடுமாறிக் கொண்டிருக்கிறது. (கூழுக்கும் ஆசை மீசைக்கும் ஆசை என்பதுதான் உண்மையான பிரச்சினை!) 

இப்படி   Winner takes all  தேர்தல் முறையின் மிகப்பெரிய குறை என்ன? மேலே சொன்ன உதாரணத்தில், ஒரு சின்ன வித்தியாசம்,  எதிர்த்து வாக்களித்த 49% சுத்தமாகப் புறக்கணிக்கப் படுகிறது, சின்ன வித்தியாசமாக இருந்தாலும் ஜெயித்தவனுக்கே மொத்த வாக்குகளும் போய்விடுவதாகக் கொள்கிற விதம்தான்! இங்கே நம்மூர்த் தேர்தல்களையே எடுத்துக் கொள்ளுங்கள்! மொத்தமுள்ள வ்வாக்குகளில் பதிவாகும் வாக்குகள் என்னவோ 50-60% தான்! அதிலும் கூட ஒரே ஒரு ஒட்டு மட்டும் கூடுதலாக, தனக்கு அடுத்து வருகிறவனை விட வாங்கிவிட்டால் போதும், அந்த ஒரு ஓட்டு 100% ஆக்கிவிடுகிற அதிசயம் அல்லது அநியாயம் தான் இந்த மாதிரித் தேர்தல் முறை! வெஸ்ட்மின்ஸ்டர் நியாயம்!

விகிதாசார பிரதிநிதித்துவம்! Proportionate Representation என்று ஒரு கட்சி வாங்கும் வாக்குகளின் அடிப்படையில் சட்டசபை அல்லது நாடாளுமன்றத்தில் சீட்டுகள் என்றிருப்பது இன்னொரு விதமான தேர்தல்முறை. இந்த முறையில் நடந்த இஸ்ரேல் தேர்தல்களில் (ஐந்து மாதங்களில் இது இரண்டாவது பொதுத்தேர்தல்) எந்தவொரு கட்சிக்கும் தனி மெஜாரிடி இல்லை, கூட்டணி அமைப்பதிலும் சிக்கல்கள், ஆக இன்னொரு பொதுத்தேர்தலை இஸ்ரேல் விரைவில் சந்திக்கலாம் என்பதிலேயே இந்தமுறையிலும் உள்ள கோளாறுகள்  வெளிப்பட்டிருக்கிறது என்றாலுமே கூட  தேர்தல் சீர்திருத்தங்களில் அதுவும் கூட களையக் கூடியதே!  

புதுக்கோட்டை ஞானாலயா ஆய்வு நூலகம் பற்றி இங்கே கொஞ்சம் பேசியிருக்கிறோம். புத்தகங்களை சேகரிப்பதையே  வாழ்க்கையின் தவமாகச் செய்து வரும் ஞானாலயா கிருஷ்ணமூர்த்தி அவர்களிடம் கணக்கன் கட்டுரைகளில் தேர்தல் சீர்திருத்தங்கள் பற்றிப் பேசிய தொடர் புத்தகமாகவும் வந்தது அவருடைய சேகரத்தில் இருக்கிறதா என்று ஆறேழு வருடங்களுக்கு முன் கேட்டதில் பிகார் இயக்கம் என்று ஜெயப்ரகாஷ் நாராயணன் நடத்திய போராட்டவிவரங்களை 47 நாட்கள் தினமணியில் தொடர்ந்து எழுதி தினமணிகதிர் வெளியீடாக  வந்ததின் நகலை உடனே அனுப்பி வைத்தார். கணக்கன் கட்டுரைகள் புத்தகம் இருப்பதாகச் சொன்னவரிடம், அதில் தேர்தல் சீர்திருத்தங்கள் பற்றி எழுதிய கட்டுரைகள் இருக்கின்றனவா என்று கேட்கத் தோன்றாதது என்னுடைய குறை.

இதை வாசித்துக் கொண்டிருக்கும் நண்பர்களிடம் வேண்டுவது  ஒன்றேதான்! இந்தமாதிரிப் பழைய புத்தகங்கள் உங்களிடம் பயனில்லாமல் பரணில் கிடக்குமானால், அவைகளை எடைக்குப்போட?வோ கரையான் அரித்து தூர எறியவோ முனையாமல் புத்தகங்களை தன்னுடைய கண்ணைப் போலப்  பராமரித்து, வேண்டுகிறவர்களுக்குப் பயன்படுகிறவிதமாக வழங்கிவரும் ஞானாலயா கிருஷ்ணமூர்த்தி ஐயாவுக்கு அனுப்பிவைத்தால் என்னைப்போல புத்தகம் இருந்தும் பராமரிக்கமுடியாமல் தொலைத்துவிட்டு பின்னொருகாலத்தில் தேடுகிறவர்களுக்கு மீண்ட சொர்க்கமாக, மீளவும் கிடைக்கும்!  

தேர்தல் சீர்திருத்தங்களின் அவசியத்தைக் கொஞ்சம் இஸ்ரேல் தேர்தலைவைத்து இங்கே  பார்த்திருக்கிறோம் இல்லையா எப்படி என்பதைக் கொஞ்சம் யோசித்துப் பதில் சொல்ல முடிகிறதா என்று கொஞ்சம்  முயற்சித்துப் பாருங்களேன்! அப்படியே   இந்தியாவில் இந்த  விகிதாசார பிரதிநிதித்துவம் எல்லாம் ஒத்துவருமா என்றும் கூட! 

மீண்டும் சந்திப்போம்.