கொஞ்சம் திரைப்படங்கள்! கொஞ்சம் சீரியல்கள்!

சில திரைப்படங்களுக்கு ஊடகங்கள் கொடுக்கிற அதீத பில்டப்பை நம்பிப்படம் பார்க்கப்போனோமேயானால் ஏமாற்றம்தான் மிஞ்சும் என்பதை பலமுறை அனுபவித்துப் பார்த்திருந்தாலும் ........!

ஆர்டிகிள் 15! இந்தப்படத்தை சமூக ஊடகங்களில் ஆஹா ஓஹோவென தலையில் தூக்கிக் கொண்டாடுவதைப் பார்த்து நானும் சிக்கிக்கொண்டேன்! சப் டைட்டில்களுடன்தான் படத்தை பார்த்தேன் என்றாலும், இந்தப்படத்தை  ஒரு போலீஸ் கிரிமினல் விசாரணை த்ரில்லராகவோ அல்லது தம்பட்டமடிக்கப்பட்ட  மாதிரி உத்தர பிரதேசத்தில் நிலவும் ஜாதிப் பிரச்சினையை அப்பட்டமாகத் தோலுரித்துக் காட்டின படமாகவோ எனக்குப் படவில்லை.

படத்தின் துவக்கத்தில் சயானி குப்தா ஒரு குழுவோடு சேர்ந்து  இந்தப் பாடலைப் பாடுவதாக வருகிறது. பாடல் என்னவோ பழசுதான்! ஒரு தலித் பெண்ணாக இந்த தேசத்தில் வசதிபடைத்தவர்களுக்கும் ஏழைகளுக்கும் இடையிலான இடைவெளி குறித்த ஒரு பிரசார பாடலைப்     பயன் படுத்தி இருக்கிறார்கள்! இந்தப்பாடல் குறித்து யூ ட்யூபில் விவரம் தேடினால்  நவம்பர் 2011 இல் வலையேற்றி இருப்பதாகத் தகவல் சொல்கிறது. அடுத்து  பாப் டைலன் ஆல்பத்தில் இருந்து இந்தவரிகளில் ஆரம்பிக்கும் பாடலும் ஒலிக்கிறது. அந்தஆங்கிலப்பாடலும் அதே உள்ளவன் இல்லாதவன் இடைவெளி பற்றிச் சொல்வதுதான். 

How many roads must a man walk down
Before you call him a man?
How many seas must a white dove sail
Before she sleeps in the sand?
Yes, 'n' how many times must the cannon balls fly
Before they're forever banned?
The answer, my friend, is blowin' in the wind

The answer is blowin' in the wind 

இந்த இரண்டு பாடல்களை வைத்துக் கொண்டு  ஒரு கதையை பின்னினால் எப்படி இருக்கும்? கமல் காசர் formula படி மானே தேனே சேர்க்கிறமாதிரி காவிக்கொடியுடன்  கும்பலைக் காட்டி என்னவோ அரசியலும் சேர்த்திருக்கிறார்கள்.இதுதான் படம் என்று சொன்னால் சப்பென்று ஆகிவிடாதா? அப்படித்தான் சப்பென்று ஆகியிருக்கிறது!

பொதுவாக, கொஞ்சம் ஆங்கில சீரியல்களைப் பார்க்கிற வியாதி என்னுடைய மகனிடமிருந்து தொற்றிக்கொண்டது தான் என்றாலும் Netlix இல் ஸ்ட்ரீமிங் வீடியோக்களாகப் பார்ப்பது ஒரு addiction என்றே ஆகிவிட்டது. இஸ்தான்புல் பின்னணியில் The Protector என்றொரு வெபசீரீஸை ஆங்கில சப்டைட்டில்களுடன் பார்த்துக் கொஞ்சம் அதிசயித்தேன். அதென்னவோ முதல் சீசன் நன்றாக இருக்கிறதே என்று அடுத்த சீசனைப் பார்க்கப்போனால் நன்றாக வைத்துச் செய்து விடுகிறார்கள்!  The Protector சீசன் 2 என்னைப் பொறுத்தவரை ஏமாற்றமே! ஏமாந்த கதையை யாராவது விலாவாரியாகச் சொல்லிக்கொள்வார்களா என்ன?!

அப்படியானால்  தமிழில் சீரியல்களே பார்ப்பதில்லையா? கலர்ஸ் டிவியில் பேரழகி, திருமணம் என்று இரண்டு சீரியல் நடுவிலிருந்து பார்த்துக் கொண்டிருக்கிறேன்! பேரழகி கொஞ்சம் வித்தியாசமாக ஆரம்பித்தார்களே என்று பார்க்க ஆரம்பித்ததில்,இதுவும் சேர்ந்து கொண்டது. ஆங்கிலத்தில் அது ரெகுலர் சீரியலாக இருக்கட்டும், வெப்சீரீஸாக இருக்கட்டும் ஒரு சீசன் 13 எபிசோடைத்தாண்டாது. கதையை நன்றாகக் கூறுபோட்டு, இந்த சீசனுக்கு இதுவரைதான் என்று திட்டமிட்டு கதையை நகர்த்திக் கொண்டுபோகிற உத்தி மிகவும் வெற்றிகரமாக எடுபட்டதை நம்மூர் தயாரிப்பாளர்கள் லட்சியம் செய்வதே இல்லை. கொஞ்சம் நன்றாகப் போகிறது என்று தெரிந்து விட்டால் போதும் , சவ்வாக இழுத்து ஆயிரம் எபிசோடுக்கும் மேலேயும் போகிற பேராசை! போன வருடம் மே மாதம் ஆரம்பித்ததாக நினைவு, பேரழகி போன சனிக்கிழமை 394 வது எபிசோடைத் தொட்டுவிட்டார்கள்!

ஆரம்ப நாட்களில் பொதிகையில் வாரம் ஒருநாள்தான், 13 வாரங்களில் எத்தனைபெரிய கதையாக இருந்தாலும் முடித்துவிடுவார்கள்! அகிலனின் சித்திரப்பாவையாகட்டும், ஆளவந்தார் கொலைவழக்காகட்டும் 13 எபிசோடுதான்! இந்த மெகா மெகா சீரியல் என்று சவ்வாக இழுக்கிற கொடுமையை சன் டிவிதான் ஆரம்பித்து வைத்து இன்றைக்கும் அமோகமாக நடத்திக் கொண்டிருக்கிறது.

கொஞ்சம் மாறுதலுக்காக.இப்படியும் எழுதிப்பார்க்கலாமே! 

மீண்டும் சந்திப்போம்.