தடங்கல், தேங்கி நிற்பகெல்லாம் நம்முடைய சாய்ஸ் மட்டும் தான்!

TBR Joseph என்றொரு பதிவர்! முன்னாள் வங்கி மேலாளர், என்னுலகம் என்றொரு வலைப்பக்கத்தில் முன்பெல்லாம் வங்கித்துறை சார்ந்த பதிவுகளை எழுதிக்  கொண்டிருப்பார். சிலவருடங்களுக்குப் பிறகு அவருடைய இந்தப்பதிவில் மீண்டும் தொடர்பு கொள்கிற, பின்னூட்டமிடுகிற வாய்ப்பு நேற்றும் முன்தினமும் கிடைத்தது. ஈகோ, பிடிவாதகுணம் பற்றி ஒரு மேலோட்டமான பதிவு அது. அதேபோல எனக்குப் பிடித்த சேத் கோடின் (Seth Godin) பக்கங்களுக்கும் போய் வாசிக்கிற ஒரு அனுபவம் இன்று!  

  

யார் இந்த சேத் கோடின் என்று தெரிந்து கொள்ள விரும்புகிற நண்பர்கள் மேலே இந்த 56நிமிட வீடியோவைப் பார்க்கலாம் அவருடைய வலைப்பக்கத்தில் போய் வாசிக்கலாம்! தினசரி ஏதாவது உங்களுடைய சிந்தனையைக் கிளறுகிற மாதிரி ஒரு விஷயம் நிச்சயம் இருக்கும்!  நேற்றைய பதிவாக Being stuck is reasonable என்ற தலைப்பில், சுருக்கமாக நச் என்று வெறும் பதின்மூன்றே  வரிகளில் ஒரு வாழ்க்கை யதார்த்ததைப் புட்டு வைத்திருக்கிறார்.

தேங்கி நிற்பதெல்லாம் ஒரு காரணத்தோடுதான்! அப்படித் தேங்கி நிற்பதற்கு நீங்கள் எடுத்த ஒவ்வொரு முடிவும், இப்படியே இருந்துவிட்டுப் போகட்டுமே என்று இழுத்து நிறுத்தி வைத்திருக்கிற அத்தனையும் எல்லாம் ஒரு காரணத்தோடு தான்! உங்கள் அனுபவத்தில்,பாதுகாப்பாக உணர்வதற்கு எச்சரிக்கையோடு, நீங்கள் எடுத்திருக்கிற முடிவுகளுக்குப் பாராட்டத் தான் வேண்டும், இல்லையா?

அப்படித் தேங்கி நிற்பதிலிருந்து விடுபட ஒரேவழி, முதலில். காரணம் காரியமென்று சாக்குப்போக்கு தேடிக் கொண்டிருப்பதில் இருந்து வெளியே வ்ருவது தான்.எப்படி? Reasonable என்று முதலில் நியாயப்படுத்திப் பார்த்ததற்கு நேரெதிராக unreasonable ஆகச்செய்து பார்ப்பதுதான்! அப்படிச் செய்யாததால் தானே முதலில் சிக்கிக் கொண்டீர்கள்?     

If you truly want to get unstuck, if you want to move to higher ground or do something more worthwhile, the first question to ask is, “Am I willing to be unreasonable, at least for a while?” என்ற முத்தாய்ப்போடு இந்த விஷயத்தை முடிக்கிறார். 

ப்பூ! இதென்ன பிரமாதம் என்று நினைக்கிறீர்களா? அதுதான் இல்லை! reasonable, unreasonable என்று இரு  வார்த்தைகளில் முடித்துவிடக்கூடிய எளிமையான தீர்வு இல்லை இது. ஒரு கதையாகப் பார்த்து விடலாமா? 

ஒரு முனிவருக்கு சாபம். பன்றியாகப் பிறக்க வேண்டுமென்று.

முனிவருக்குத் தாள முடியாத துக்கம், எவ்வளவு ஜபம், எவ்வளவு நியமத்தோடு காரியங்கள் ......கடைசியில் பன்றியாகப் பிறப்பதற்குத் தானா? மகனைக் கூப்பிட்டார்.

"மகனே, சாபத்தினால் பன்றியாகப் பிறக்க வேண்டியுள்ளது.அப்படிப் பிறந்தவுடன், தயவு தாட்சண்யம் பார்க்காமல் கொன்று விடு."

மகனும் தந்தைக்கு அப்படியே செய்வதாக வாக்களித்தான்.முனிவரும் பன்றியாகப் பிறந்தார். மகன், வாளை எடுத்துக் கொண்டு கொல்லப் போனான். புதிதாகப் பிறந்த குட்டிப் பன்றி சொன்னது, "மகனே, இப்போது தான் பிறந்திருக்கிறேன். ஆறு மாதம் கழித்து வா." மகனும் வாளை எடுத்துக் கொண்டு திரும்பிப் போனான்.

ஆறு மாதம் முடிந்தது. மகனும் வாளை எடுத்துக் கொண்டு பன்றியை வெட்டுவதற்காக வந்தான். பன்றி வளர்ந்து, பெண்பன்றி, குட்டிகள்எனப் பெருகி, குடும்பமாய் வாழ்வதைக் கண்டான். "நில்லடா, இப்போது தான் பன்றியாய் வாழ்வதிலும் ஒரு சுகம் இருக்கிறது எனத் தெரிந்து கொண்டிருக்கிறேன், சிறிது காலம் கழித்து வா."

மகனுக்குத் தாள முடியாத துக்கம். வேதம் படித்தவர். கல்வி, கேள்விகளில் சிறந்தவர்.ஏதோ, முன் வினை, இப்படி இழிபிறப்பாய்ப் பிறந்து, உழன்று கொண்டிருக்கிறாரே என்று வாளை ஓங்கி வெட்ட முனைந்தான்.

அவ்வளவுதான், முற்பிறப்பில் அவனுக்குத் தந்தையாய் இருந்த அப்பன்றி வெகுண்டெழுந்தது. கோபத்தோடு சொன்னது, "முட்டாளே, என்ன காரியம் செய்யத் துணிந்தாய்? பன்றி வாழ்க்கை என்றால் கேவலமா? இதில் எத்தனை சுகம் இருக்கிறது தெரியுமா உனக்கு? உனக்குத் தெரியவில்லை என்றால் ஒதுங்கிப்போய் விடு. எவ்வளவு சந்தோஷமாக இருக்கிறேன் தெரியுமா, அதைக் கெடுக்காதே, போய்விடு.வேண்டுமானால், வாளை உன் நெஞ்சில் பாய்ச்சிக் கொண்டு மடிந்து போ "

ஆக்ரோஷமாய் உறுமிவிட்டு, பன்றி தன் பெண்டு பிள்ளை குட்டிகளோடு ஓடி மறைந்தது. மகன் இந்த விநோதத்தைக் கண்டு விக்கித்து நின்றான்.

"செல்லடா! செல்க தீக்குணத் திழிஞ!
எனக்கிவ் வாழ்க்கை இன்பமுடைத் தேயாம்;
நினைக்கிதில் துன்பம் நிகழுமேல் சென்றவ்
வாளினின் நெஞ்சை வகுத்து நீ மடிக"
என்றிது கூறி இருந்தவப் பன்றிதன்
இனத்தோடும் ஓடி இன்னுயிர் காத்தது.

பாரதி கவிதை வரிகளில் இந்தக் கதையைக் கேட்டதுண்டு. கேட்ட பொழுதில், ஒரு வினோதமான கதை என்ற அளவிற்கு மேல் யோசிக்கத் தெரிந்ததில்லை.

நம்முடைய எண்ணங்கள் செயல்கள் எல்லாவற்றிற்கும் நாமே எஜமானர்கள் என்று நினைத்துக் கொண்டிருக்கிறோம். விருப்பமாக, ஆசையாக எழுபவை எல்லாம் நம்முடையவை என்று நினைத்துக் கொண்டிருக்கிறோம். கொஞ்சம் கூர்ந்து கவனித்துப் பார்த்தோமேயானால், எதுவெல்லாம் நம்முடையது என்று நினைத்துக் கொண்டிருக்கிறோமோ, அத்தனையும் வெளியில் இருந்து வருவது, புலன்கள் வழி மனம் போகும் போது, ஏற்படுகிற மயக்கம், ஒரு விகாரம் அவ்வளவு தான்.

பழக்கம் எப்படி ஆரம்பிக்கிறது? முதலில், கொஞ்சம் சுகமாக, சௌகரியமாக இருப்பதாக நம்ப வைத்து, சமையல் அறைச் சுவற்றில், எண்ணைப் புகை அழுத்தமாகப் படிந்து போவது போல, நம்மிடம் ஒட்டிக் கொள்கின்றன. ஆரம்பத்தில், நாம் அதற்கு எஜமானர்களாக இருக்கிறோம். அல்லது அப்படி நம்மை நம்ப வைத்து, நம்மை அதனதன் போக்கில் அலைக்கழித்து, ஆட்டிவைக்கும் எதிரிகளாக ஆகி விடுகின்றன.

காலையில் எழுந்தவுடன் சிலருக்கு காபி அல்லது டீ உடனே குடித்தாக வேண்டும். அப்புறம் செய்தித்தாள் படிக்கிற வேலை, வெண்குழல் வத்தியைப் பற்ற வைத்துக் கொண்டு சிந்தனை வருகிறதோ இல்லையோ, புகையை விட்டுக் கொண்டு, பெரிய சிந்தனாவாதி போல, ஒரு லுக்கு விட வேண்டியது. இப்படி ஒவ்வொருவரும், நம்மையே கூர்ந்து கவனித்துப் பார்த்தோமேயானால், நம்முடைய வாழ்க்கையின் பெரும் பகுதியைப் பழக்கங்களின் அடிமையாகவே இருந்து கழிப்பதை, உணர முடியும்.

நமக்குக் கற்பிக்கப் பட்டிருக்கிற பழக்கங்கள், நம்முடைய ஒவ்வொரு சிந்தனை இழையையும், செயலையும் தன்னுடைய கட்டுப்பாட்டில்வைத்திருப்பதைக் கூட நம்மால் உணர முடிவது இல்லை. நம்முடைய எண்ணங்களுக்கு, செயல்களுக்கு, நாம் எஜமானனாக இருப்பதற்குப் பதிலாக, பழக்கங்கள், மிக சாமர்த்தியமாக நம்மை அடிமையாக வைத்திருக்கின்றன.
ஸ்ரீ அரவிந்தர், தாயகத்திற்குத்திரும்பிய புதிதில் மும்பையில் சந்தித்த ஒரு யோகி, விஷ்ணு பாஸ்கர லீலே சொன்னபடி, எண்ணங்கள் ஆசைகள் எல்லாம் எங்கிருந்து வருக்கின்றன என்று ஆராய்ந்து, வெளியிலிருந்து என்றால், அவற்றைத் திருப்பி அனுப்பிவிடும் பயிற்சியில். மூன்றே நாட்களில், சித்தி பெற்றதை முந்தைய பதிவொன்றில் பார்த்திருக்கிறோம்.

ஸ்ரீ ரமண மஹரிஷி காட்டிய "நான் யார்" என்ற விசார மார்க்கமும் இதுவே.

Emptying the cup என்பதாக ஜென் கதைகளில் படிக்கும் போது, வடிவேலு மாதிரி 'அட, ஆமா இல்லே' என்று நம்மைப் பற்றிய ஞானம் கிடைத்து விட்டதாகத் தோன்றும்.ஆனால் அது அவ்வளவு எளியது இல்லை. என்று மார்ச் 2009 இல் இந்தப் பக்கங்களில் எழுகியதையும் சேர்த்துப் பார்த்து யோசிக்க வேண்டியிருக்கிறது. 

சேத் கோடின் நடைமுறைப் பிரச்சினை ஒன்றுக்கு எளிமையாக ஒரு தீர்வைச் சொல்லிவிட்டுப் போய்விடுகிறார். உண்மையிலேயே அது அத்தனை எளிதானதுதானா?

கொஞ்சம் யோசித்து,பதில் ஏதாவது கிடைக்கிறதா என்று சொல்லுங்களேன்! மீண்டும் சந்திப்போம்.